Бүгін Ордабасы ауданының орталығы Темірланда «Nur Otan» партиясы аудандық филиалының кезектен тыс ХLVІ конференциясы өтті. Жиынға «Nur Otan» партиясы Түркістан облыстық филиалы төрағасының бірінші орынбасары, облыстық Саяси кеңес бюросының мүшесі, облыстық мәслихаттағы фракция жетекшісі Бейсен Тәжібаев, аудандық мәслихат хатшысы, депутаттық фракцияның мүшелері, бастауыш партия ұйымдарынан ұсынылған делегаттар қатысты.
Келелі кеңесте бас партияның облыстық филиалы төрағасының бірінші орынбасары сөз алып, партияластар алдында «Өзгерістер жолы: Әр азаматқа лайықты өмір!» атты сайлауалды бағдарламаны орындау міндеті тұрғанын жеткізді. Бұл ретте депутаттар мен жергілікті атқарушы органдарға үлкен жауапкершілік жүктелгенін, ел сенімін ақтау бағытында тоқтаусыз жұмыс жүретінін айтып өтті.
Конференцияның күн тәртібінде 3 мәселе қаралады. Әуелі «Nur Otan» партиясы Ордабасы аудандық филиалының төрағасы болып Ордабасы ауданының әкімі Батыршаев Бағлан Дәнебекұлы сайланды.
Сол жиын соңында қуанышты оқиға болды. Алдымен «Nur Otan» партиясы Ордабасы аудандық филиалының жаңа ғимаратының салтанатты ашылу рәсімі өтті. Ғимараттың лентасын партия ардагері Бостандық Жәкей мен партияның Ордабасы аудандық филиалының төрағасы Бағлан Батыршаев қиып, жұртшылықты құттықтады.
Демеушілер есебінен салынған ғимаратта халықпен тығыз байланыста жұмыс істеуге қолайлы жағдай жасалған. Қоғамдық қабылдау бөлмесі, қажетті инфрақұрылымы бар. «Nur Otan» партиясы Түркістан облыстық филиалы төрағасының бірінші орынбасары Бейсен Тәжібаев әріптестерінің жұмысына сәттілік тілеп, ел сенімін ақтайтындарына сенім білдірді. Сонымен бірге демеушілер тарапынан Nur Otan» партиясы Ордабасы аудандық филиалына автокөліктің кілті тапсырылды.
