Шымкент қалалық халықты жұмыспен қамту орталығы мен қалалық жеке сот орындаушыларының өңірлік палатасы алимент борышкерлеріне арналған бос жұмыс орындары жәрмеңкесін ұйымдастырды. Мұндағы мақсат – жұмыссыз борышкерлерді жұмысқа орналастыруға жәрдемдесу, кеңес беру немесе жұмыс іздеуші ретінде тіркеу.
– Жәрмеңкеге 50-ден аса азамат қатысты. Оларға қала аумағында орналасқан 10-ға жуық кәсіпорын мен мекемелерден 200-ге жуық бос жұмыс орны мен жұмыспен қамту орталығы тарапынан 1 382 бос жұмыс орны ұсынылып, кеңес берілді, – деді жұмыспен қамту орталығының бөлім басшысы А.Қабылбек.
– Атап өту керек, борышкерлер ұсынған жұмыстан бас тартса немесе халыққа қызмет ету орталықтарына келмесе, ол атқару құжаттың орындауынан жалтару деп саналады және Заңмен көзделген әкімшілік немесе қылмыстық іске тартуға негіз болып табылады, – дейді Шымкент қалалық жеке сот орындаушыларының өңірлік палатасы басшысының орынбасары А.Сартбаева.
Жалпы, жәрмеңке нәтижесінде 47 борышкер жұмыс іздеуші ретінде тіркеліп, 15-сі тұрақты жұмысқа жолдама алды.
