Түркістан қаласында 1000-ға жуық тұрғын баспаналы болады

Түркістан қаласында жыл соңына дейін 1000-ға жуық кезектегі тұрғынның баспаналы болуы жоспарлануда. Қала әкімі Рашид Аюпов құрылысы жүріп жатқан көпқабатты үйлердің жұмыс барысын бақылап, сапасын тексерді.
Рашид Абатұлы «Құрылыс бөлімінің» басшысы Нұрсұлтан Жақсылыққа жұмыстардың кестеге сай жүруі үшін күнделікті бақылау жұмыстарын ширатуды тапсырды. Сондай-ақ, жұмыстардың бәсеңдігіне және жұмысшылар санының аздығына сын айтып, ширату қажеттігін ескертті. Осы тұста, жұмыссыз азаматтарды болашақта тұрғындарға баспана жағынан қуаныш сыйлар іске атсалысуға шақырды. Сонымен қатар, абаттандыру мен көгалдандыру жұмыстарына да біршама ескерту айтты.
Жалпы, қазіргі таңда облыс орталығында 7, 9 және 12 қабатты 82 тұрғын үйдің құрылысы жүріп жатыр. Үйлер құрылысы аяқталған уақытта тұрғын үй кезегінде тұрған 1000 ға жуық тұрғын баспаналы болады деп жоспарлануда. Яғни пәтерлер ел игілігіне жыл соңына дейін берілетін болады.