Түркістан облысында саяхаттауға шыққан 7 адам із-түссіз жоғалып кетті

Түркістан облысының, Төле би ауданында тауға саяхаттауға шыққан 7 адам әлі күнге табылмай жатыр. Белгілі болғандай туристер 21 мамыр күні «Сары-Айғыр» шатқалына жаяу бет алған. Содан із-түссіз жоғалып кеткен. Олардың жоғалғаны туралы хабарлама 112 пультіне 2021 жылғы 25 мамырда сағат 18:30-да келіп түскен. Құтқарушыларға хабарласқан адамның айтуынша, олар 24 мамырда үйге оралуы керек болатын. Қазіргі таңда Түркістан облысының құтқарушылары Төлеби ауданындағы Сайрам-Өгем мемлекеттік ұлттық табиғи паркінің аумағында жоғалған 7 адамды іздестіру жұмыстарын жүргізуде. Бұл туралы ҚР ТЖМ ресми өкілі Талғат Уәли хабарлады.
Түркістан облысы ТЖД баспасөз қызметінің мәліметінше, өткен тәулікте іздестіру топтары 37 шақырымға жуық таулы аймақты жаяу аралады. Екі пилотсыз ұшу аппараты арқылы 4 шақырым радиуста ұшу жүргізілген.
Іздестіру жұмыстарына Түркістан облысы ТЖ департаментің 25 құтқарушысы, 2 квадракоптері және 7 техникасы жұмылдырылды. Сондай-ақ, полиция департаментінің 4 қызметкері мен 1 техникасы, жергілікті атқарушы органдардың 2 қызметкері мен 1 техникасы, ҰҚК Шекара қызметінің 3 ат патрулі, ұлттық парктің 10 қызметкері мен жоғалғандардың туыстары іздестіруге атсалысуда.
«Қазавиақұтқару» АҚ тікұшағы әуеге көтеріліп, іздеу жұмыстары жағасуда – делінген Түркістан облысы ТЖ департаменті таратқан хабарламада.