Шымкент гарнизонындағы әскери бөлімдер мен мекемелер арасында футболдан және үстел теннисінен гарнизон бастығының кубогына чемпионат өтуде. Байрақты бәсекеде 12 команда немесе 156 әскери қызметші бақ сынады.
Спорттық іс-шара гарнизондағы әскери қызметшілер арасында салауатты өмір салтын ұстану, спортпен тұрақты айналысуға шақыру және шеберлігін арттыру мақсатында өткізілді.
Сайыс қорытындысы бойынша, футболдан гарнизон чемпионы атағын механикаландырылған бригада командасы ұтып алып, 2 жыл бойы Шымкент қаласындағы авиа базада тұрған гарнизон бастығының ауыспалы кубогымен қоржындарын толтырды.
Ал, үстел теннисінен әуе шабуылына қарсы қорғаныс әскерлері бригадасының әскери қызметшілері алдыңғы шептен көрінсе, үздік үштікті әскери полиция қызметкерлері тұйықтады.
— Шымкент гарнизоны әскери бөлімдері мен мекемелері өздеріне жүктелген міндеттерін абыроймен атқарып, халықаралық әскери сайыстарда еліміздің көк Туын биіктерде желбіретуде. Оған өздеріңіз жыл сайын, куә болып жүрсіздер. Сондықтан әрбір әскери қызметшінің борышы – әскери істе қажетті өнерді үйрену, – деді гарнизонның бастығы подполковник Нұркен Қарағұлов.
Шымкент гарнизоны баспасөз қызметі
