Шымкентте әскерилер арасында эстафета өтті

Отан қорғаушылар күні мен Жеңіс күні қарсаңында Шымкент қаласындағы Әуе шабуылына қарсы қорғаныс әскерлерінің бригадасында әскери-спорттық эстафета өтті. Іс-шараның бастамашысы әскери қызметшілердің отбасы мүшелерімен жұмыс қызметі болды.
Спорттық мереке жеке құрамның жалпы сапынан басталды, алғашқы сөзді әуе шабуылына қарсы қорғаныс бригадасының командирі полковник Орынбасар Жұбанов алды.
— Біздің бейбіт аспанымыз, ардагерлеріміздің арқасы. Олар ұрпақтарына бейбітшілік сыйлау үшін өмірлерін қатерге тікті. Біздің міндетіміз – бейбітшілікті сақтау. Сондықтан әрбір әскери қызметшінің борышы – әскери істе пайдалы болатын нәрселерді үйрену, — деп атап өтті командир.
Жүлдеге 6 команда таласты. Эстафетаның кезеңдері: жүгіру, граната лақтыру, гір көтеру, пневматикалық мылтықтан нысананы ату, зембілде жаралыларды тасымалдау және жүк көлігінің дөңгелегін жылжыту.
Мұндай әскери-спорттық жарыстар жеке құрамның дене дайындығы деңгейін арттыруға және әскери ұжымдарда бірлікті нығайтуға ықпал етеді.
Шымкент гарнизонының баспасөз қызметі