Халықаралық қарттар күніне орай Шымкент қаласының әкімі Ғабит Сыздықбеков аға буын өкілдерінің шаңырақтарына барып, мерекемен құттықтады. Қала әкімі Рахматулла Мәуленов, Өркен Әбдіреев, Шәки Күлмажитов және Сәбит Рүстемовтің үйлерінде болып, қарияларға ізгі тілегін білдірді.
Кездесу барысында ақсақалдар өздерінің естеліктерімен бөлісіп, еңбек жолдары мен отбасылық дәстүрлері туралы әңгімеледі. Қала әкімі ардагерлердің көп жылғы еңбегі мен Шымкенттің дамуына қосқан үлесіне алғысын білдіріп, естелік сыйлықтар табыстады. Сондай-ақ оларға зор денсаулық, ұзақ ғұмыр, бақ-береке және жан тыныштығын тіледі.
Айта кетейік, бүгінде Шымкентте 105 мыңнан астам зейнеткер тұрады. Олардың өмір сүру сапасын арттыруға, денсаулығын нығайтуға және белсенді өмір салтын ұстануына бағытталған түрлі әлеуметтік қолдау шаралары қарастырылған.
Халықаралық қарттар күніне орай Шымкентте жасы 70-тен асқан 29 841 тұрғынға 3 айлық есептік көрсеткіш (АЕК) мөлшерінде біржолғы материалдық көмек көрсетілді. Сонымен қатар 80 жастан асқан жалғызбасты 101 қарияға ай сайын 2 АЕК көлемінде әлеуметтік төлем беріледі.
Биыл санаторий-курорттық жолдамамен 8 735 адамды қамту жоспарланып, оның ішінде 5 090 адам жолдамамен қамтамасыз етілді. «Белсенді ұзақ өмір сүру» орталығының төрт бөлімшесінде күн сайын 800-ден астам зейнеткер түрлі іс-шараларға қатысады. Қариялардың бос уақытын тиімді өткізіп, денсаулығын нығайтуы үшін спорттық, шығармашылық және сауықтыру бағытындағы сабақтар ұйымдастырылған.
Сондай-ақ Шымкентте 70 жастан асқан тұрғындар қоғамдық көлікте тегін жүреді. Бұдан бөлек, аға буын өкілдеріне театрларға, музейлерге, хайуанаттар бағына және дендросаябаққа тегін бару мүмкіндігі қарастырылған. Мұндай шаралар қариялардың қоғамдық өмірге белсенді араласуына, рухани қажеттіліктерін өтеуіне және бос уақытын мазмұнды өткізуіне ықпал етеді.
Аға буынға құрмет көрсету – ұлттың рухани құндылықтарын дәріптеудің, ұрпақтар сабақтастығын сақтаудың маңызды көрінісі. Өмірлік тәжірибесі мол, елдің қалыптасуы мен өркендеуіне өзіндік үлес қосқан ардагерлердің өнегелі жолы жас ұрпақ үшін әрдайым үлгі. Олардың ақыл-кеңесі мен тағылымды әңгімелері қоғамның бірлігі мен отбасылық құндылықтардың нығаюына септігін тигізеді. Сондықтан қарттарға қамқорлық жасау тек мерекелік күндермен шектелмей, күнделікті өмірдің ажырамас бөлігіне айналуы тиіс.
Мемлекет басшысы Қасым-Жомарт Тоқаев та өз сөздерінде аға буын өкілдеріне құрмет көрсетудің, олардың өмірлік тәжірибесі мен еңбегін бағалаудың маңызын бірнеше рет атап өткен. Президент көтерген әлеуметтік жауапкершілік, өзара құрмет және ұрпақтар сабақтастығы қағидаттары қоғамдағы татулық пен тұрақтылықты нығайтуда айрықша мәнге ие. Осы тұрғыдан алғанда, қарт адамдарға лайықты жағдай жасау, олардың әлеуметтік қорғалуын қамтамасыз ету және белсенді өмір сүруіне мүмкіндік беру – ортақ міндет.
Шымкент қаласында жүзеге асырылып жатқан әлеуметтік қолдау шаралары да осы бағыттағы жұмыстардың бір бөлігі. Қариялардың денсаулығын нығайтуға, демалысын ұйымдастыруға, мәдени және қоғамдық іс-шараларға қатысуына жағдай жасау олардың өмір сапасын жақсартуға бағытталған. Аға буынға көрсетілген құрмет – өткенге тағзым ғана емес, болашақ ұрпаққа үлгі болатын ізгілік пен адамгершіліктің көрінісі.
