Шымкент қаласында мемлекеттік органдар жұмысының тиімділігін арттыру, бюджет қаражатын ұтымды пайдалану және тұрғындармен ашық байланыс орнату мәселелері талқыланды. Қала әкімі Ғабит Сыздықбековтің төрағалығымен өткен аппараттық кеңесте мемлекеттік сатып алу саласындағы талаптардың орындалуы, ақпараттық ашықтық және мемлекеттік органдардың азаматтармен кері байланысы жөніндегі бірқатар өзекті мәселе қаралды.
Жиын барысында мемлекеттік сатып алу рәсімдерінің заң талаптарына сәйкес жүргізілуі мен бюджет қаражатының тиімді жұмсалуына ерекше назар аударылды. Бұл бағытта алдын ала бақылау тетіктерін күшейтіп, ықтимал заң бұзушылықтарды олар орын алғанға дейін анықтау қажеттігі айтылды.
Шымкент қаласы бойынша Ішкі мемлекеттік аудит департаменті басшысының орынбасары Нұржан Сүлейменовтің мәліметінше, қазіргі таңда мемлекеттік қаражаттың тиімсіз жұмсалуына жол бермеу үшін превентивті бақылау тетіктерін дамытуға басымдық беріліп отыр.
Мұндай тәсілдің негізгі мақсаты – сатып алу процесінде орын алуы мүмкін тәуекелдерді ерте кезеңде анықтап, олардың алдын алу. Осы бағытта цифрлық технологияларды пайдалану ауқымын кеңейту көзделген.
Сонымен қатар мемлекеттік қаражаттың жұмсалуын бақылауға мүмкіндік беретін «Онлайн-бюджеттік мониторинг» жүйесін енгізу жұмыстары жалғасуда. Қазіргі уақытта жоба пилоттық режимде іске асырылып, қоғам үшін маңызы жоғары төрт негізгі саланы қамтиды. Олар – білім беру, денсаулық сақтау, спорт және мәдениет бағыттары.
Мемлекеттік сатып алудың сапасын арттыру бойынша да жүйелі жұмыстар жүргізілуде. Аудит департаменті типтік сипаттағы заң бұзушылықтарды болдырмау үшін сатып алу рәсімдеріне қойылатын талаптардың сақталуын бақылауға басымдық беріп отыр.
Бұл ретте мемлекеттік сатып алу шарттарының заңдылығы мен негізділігіне, рәсімдердің ашық өткізілуіне және бюджет шығыстарын алдын ала әрі тиімді жоспарлауға назар аударылады. Мұндай шаралар мемлекеттік қаражатты мақсатты пайдалануға және сатып алу процесіндегі тәуекелдерді төмендетуге бағытталған.
Аппараттық кеңесте мемлекеттік органдардың бұқаралық ақпарат құралдарымен байланысы мен ақпараттық жұмысы да қаралды. Шымкент қаласының Ішкі саясат басқармасының басшысы Азамат Пармановтың айтуынша, ақпараттық кеңістіктегі жағдай тұрақты бақылауда.
Басқарма тарапынан әлеуметтік желілер мен ақпарат құралдарындағы қоғамдық пікірге жүйелі мониторинг жүргізіліп, тұрғындармен кері байланысты қамтамасыз етуге мән берілуде. Қала әкімдігі мен оған қарасты мемлекеттік органдардың атқарып жатқан жұмыстары туралы ақпаратты халыққа уақтылы жеткізу де негізгі міндеттердің бірі болып отыр.
Аудан әкімдіктері мен қалалық басқармалардың ресми ақпараттық парақшаларында жүзеге асырылып жатқан жобалар, қабылданған шешімдер, көрсетілетін мемлекеттік қызметтер және қала аумағындағы өзекті мәселелер бойынша тұрақты түрде материалдар жарияланады.
Ақпарат тарату барысында цифрлық коммуникациялардың мүмкіндіктерін тиімді пайдалану мәселесіне де басымдық беріліп келеді. Мемлекеттік органдардың әлеуметтік желілердегі контентін тек мәтінмен шектемей, фото және бейнематериалдармен толықтыру көзделген. Бұл тұрғындарға атқарылып жатқан жұмыстарды нақты әрі көрнекі түрде таныстыруға мүмкіндік береді.
Бұқаралық ақпарат құралдарымен байланыс та жүйелі түрде жүргізілуде. Жыл басынан бері сегіз ай ішінде Өңірлік коммуникациялар қызметінің алаңында қала дамуының өзекті бағыттары мен түрлі салаларда атқарылып жатқан жұмыстарға арналған 85 брифинг ұйымдастырылған.
Аппараттық кеңестің тағы бір маңызды тақырыбы – мемлекеттік органдар қызметінің ашықтығын бағалайтын «Ашықтық индексі» болды. Шымкент қаласы әкімінің өтініштерді қарауды бақылау бөлімінің басшысы Гүлбахыт Жұматаеваның айтуынша, аталған индекс мемлекеттік органдардың жұмысын төрт негізгі бағыт бойынша бағалауға мүмкіндік береді.
Осы бағыттардың әрқайсысы бойынша қала көрсеткіштерін жақсартуға бағытталған кешенді шаралар қолға алынған. Соның ішінде азаматтардың өтініштерін қабылдау және қарау сапасын арттыруға ерекше мән берілуде.
Атап айтқанда, «e-Otinish» жүйесіне енгізілетін мәліметтердің дұрыстығын бақылау, азаматтардың өтініштерін белгіленген мерзімде қарау және өтініш иелерімен кері байланысты қамтамасыз ету жұмыстары күшейтіледі.
Тұрғындардың мәселелерін тек тіркеп, жауап берумен шектелмей, олардың қайталану себептерін анықтау қажеттігі де атап өтілді. Осыған байланысты бір мәселе бойынша бірнеше рет жолданған өтініштерді талдау арқылы жүйелі проблемаларды анықтап, оларды шешуге бағытталған нақты шаралар қабылдау маңызды.
Мемлекеттік орган басшыларының азаматтарды жеке қабылдау тәжірибесін жетілдіру де күн тәртібіндегі мәселелердің бірі болды. Сонымен бірге тұрғындармен байланыс орнатудың цифрлық арналары кеңейтіліп, азаматтардың мемлекеттік органдарға жүгіну мүмкіндіктерін арттыру көзделуде.
Кеңес барысында көтерілген мәселелердің барлығы мемлекеттік басқарудың үш негізгі бағыты – тиімділік, ашықтық және халықпен кері байланыс сапасын арттыруға бағытталған.
Жиын соңында қала әкімі жауапты тұлғаларға мемлекеттік сатып алу саласындағы жұмыстардың тиімділігін арттыруды, бюджет қаражатын жоспарлау мен жұмсау кезінде заң талаптарының қатаң сақталуын қамтамасыз етуді тапсырды.
Сонымен қатар мемлекеттік органдардың ақпараттық ашықтығын күшейтіп, тұрғындарға атқарылып жатқан жұмыстар туралы мәліметтерді уақытылы әрі сапалы жеткізу қажеттігі айтылды. Азаматтардың өтініштерін қарау сапасын жақсарту және халықпен өзара байланысты нығайту бағытындағы жұмыстарды да жалғастыру міндеттелді.
Бұдан бөлек, «Ашықтық индексі» бойынша көрсеткіштерді жақсартуға арналған жеке іс-шаралар жоспарын әзірлеп, оның орындалу барысына тұрақты мониторинг жүргізу тапсырылды.
Бұл міндеттердің жүйелі жүзеге асуы мемлекеттік органдар қызметінің ашықтығын арттырып қана қоймай, тұрғындардың мемлекеттік басқару институттарына деген сенімін нығайтуға және азаматтардың мәселелерін тиімді шешуге мүмкіндік бермек.
