Шымкент қаласында тұрғындарды баспанамен қамту, өндіріс орындарының әлеуетін арттыру және жол инфрақұрылымын жаңғырту бағытындағы жұмыстар жалғасып жатыр. Қала аумағын аралаған Шымкент қаласының әкімі Ғабит Сыздықбеков бірқатар әлеуметтік және өндірістік нысандардың жұмысымен танысып, жүзеге асырылып жатқан жобалардың барысын тексерді.
Қала басшысының аралауы тұрғын үймен қамтамасыз ету, кәсіпкерлікті қолдау, отандық өндірісті дамыту және жол қауіпсіздігін арттыру бағыттарын қамтыды. Әкім әлеуметтік маңызы бар жобалардың сапалы әрі белгіленген мерзімде орындалуы тұрғындардың тұрмыс сапасын жақсартуда маңызды рөл атқаратынын атап өтті.
40 отбасы жаңа баспанаға ие болды
Жұмыс сапары барысында Ғабит Сыздықбеков Асар-2 шағынауданында жаңа пәтер алған 40 отбасыға баспана кілтін табыстады. Тұрғын үй «Отбасы банк» АҚ-ның «2-10-20» және «5-10-20» жеңілдетілген тұрғын үй бағдарламалары аясында берілді.
Жаңа қоныстанушылардың қатарында көпбалалы және толық емес отбасылар, мүгедектігі бар азаматтар, ерекше қажеттіліктері бар балаларды тәрбиелеп отырған жанұялар, сондай-ақ бюджеттік сала қызметкерлері бар.
Қала әкімі жаңа пәтер иелерін баспаналы болуымен құттықтап, отбасыларына береке мен жаңа қоныста жайлы өмір тіледі. Сонымен қатар тұрғындардың баспана алу мүмкіндіктері туралы толық әрі түсінікті ақпаратпен қамтамасыз етілуінің маңыздылығына тоқталды.
Осыған байланысты жауапты мамандарға тұрғын үй кезегіне тұру және баспана алу тәртібі бойынша ақпараттық-түсіндіру жұмыстарын күшейтуді тапсырды. Әкім азаматтарға қажетті рәсімдерді кезең-кезеңімен түсіндіретін қысқа әрі түсінікті бейнероликтер әзірлеу қажеттігін де атап өтті.
Өндіріс орындарының әлеуеті қаралды
Қала әкімінің жұмыс сапары өндірістік нысандарда жалғасты. «Жұлдыз» индустриялық аймағында Ғабит Сыздықбеков полимер бұйымдарын өндіретін «Политрейд Казахстан» ЖШС кәсіпорнының жұмысымен танысты.
Кәсіпорынның өндірістік қуаты жоғары. Мұнда жылына 100 миллион метрге дейін тамшылатып суару таспасы және 9 мың тонна дайын полимер өнімі өндіріледі. Бұл өнімдер ауыл шаруашылығы мен басқа да салаларда қолдануға бағытталған.
Өндірістік әлеуеті қаралған тағы бір нысан – темірбетоннан көпір және жол конструкцияларын шығаратын «Евро Знак» ЖШС зауыты. Кәсіпорын жылына мың данаға дейін өнім шығаруға қауқарлы. Қазіргі уақытта зауытта 50 адам тұрақты жұмыспен қамтылған.
Өндіріс орындарының жұмысымен танысқан қала әкімі кәсіпорындардың қуатын арттыру және нарықтағы мүмкіндіктерін кеңейту мәселелеріне назар аударды.
Осы бағытта Кәсіпкерлік және индустриялық-инновациялық даму басқармасына өндіріс орындарына көрсетілетін мемлекеттік қолдаудың қосымша шараларын пысықтау тапсырылды. Сонымен қатар отандық кәсіпорындар шығаратын өнімдердің өткізу нарығын кеңейтуге қолдау көрсету қажеттігі айтылды.
Қала үшін өндірістің дамуы жаңа жұмыс орындарын ашумен қатар, жергілікті экономиканың тұрақты өсуіне де ықпал етеді. Сондықтан индустриялық аймақтардағы кәсіпорындардың өндірістік мүмкіндіктерін тиімді пайдалану маңызды.
Мектеп маңындағы жол қауіпсіздігі күшейтіледі
Жұмыс сапары барысында жол қауіпсіздігі мәселесі де назардан тыс қалмады. Әл-Фараби ауданында қала әкімі №9 мектептің алдында жаяу жүргіншілерге арналған жарық сигналды бағаналарды орнату жұмыстарын тексерді.
Аталған құрылғылар жаяу жүргіншілер қозғалысы көп учаскелерде, әсіресе мектептер мен басқа да білім беру ұйымдарының маңында қауіпсіздікті арттыруға бағытталған.
Мектеп маңындағы жолдарда балалардың қауіпсіздігін қамтамасыз ету – маңызды міндеттердің бірі. Жарық сигналды бағаналар жүргізушілердің назарын жаяу жүргіншілер өткеліне аударып, жол-көлік оқиғаларының алдын алуға мүмкіндік береді.
А-2 жолын қайта жаңғырту жұмыстары тексерілді
Қала басшысы Тұран ауданындағы А-2 автомобиль жолын қайта жаңғыртудың V кезеңі бойынша жүргізіліп жатқан жұмыстармен де танысты.
Жоба жол инфрақұрылымын кешенді түрде жаңғыртуды көздейді. Оның барысында көлік ағынының қазіргі және алдағы жылдардағы жүктемесі ескеріліп, жолдың өткізу қабілетін арттыруға бағытталған жұмыстар жүргізілуде.
Аралау кезінде нысандағы құрылыс жұмыстарының қазіргі жағдайы, атқарылған жұмыстар және жедел шешуді қажет ететін мәселелер талқыланды.
Қала әкімі мердігер ұйымға құрылыс қарқынын арттырып, бекітілген жұмыс кестесінің қатаң сақталуын қамтамасыз етуді тапсырды. Сонымен қатар жобаның сапалы орындалуы мен белгіленген мерзімдердің сақталуы жауапты тұлғалардың тұрақты бақылауында болуы керектігін атап өтті.
Жалпы, Шымкентте тұрғын үй, өндіріс және көлік инфрақұрылымын дамыту бағытындағы жобалар қала тұрғындарының күнделікті өміріне тікелей әсер ететін маңызды бастамалар қатарында. Баспана мәселесін шешу, жаңа жұмыс орындарын құру, отандық өндірісті қолдау және жол қауіпсіздігін қамтамасыз ету – қаланың әлеуметтік-экономикалық дамуының негізгі бағыттарының бірі.
Қала әкімі әлеуметтік маңызы бар жобалардың сапалы әрі уақытылы жүзеге асырылуы тұрғындардың өмір сүру сапасын арттырудың негізгі факторларының бірі екенін атап өтті. Осыған байланысты жауапты басқармалар мен мердігер ұйымдарға белгіленген міндеттердің орындалуын тұрақты бақылауда ұстауды тапсырды.
