Қазақстан Республикасы Президентінің Жарлығына сәйкес Шымкент қаласының үздік педагогі Арман Орынбеков «Қазақстанның еңбек сіңірген ұстазы» құрметті атағымен марапатталды. Марапатты ҚР Білім және ғылым министрі Асхат Аймағамбетов табыстады.
Арман Орынбеков — Шымкент қаласындағы № 90 Дарынды балаларға арналған мамандандырылған мектеп-гимназиясының директоры болып қызмет атқарады. Арман Шымбайұлы 20-дан астам әдістемелік-оқу құралдарының авторы, сондай-ақ оның жетекшілігімен әріптестерінің 80-ге жуық әдістемелік-оқу құралдары жарық көрген.
Ол «Үздік педагог-2019» атағының иегері. TEACHER PRIZE KAZAKHSTAN, «ӘЛЕМ МҰҒАЛІМІ – 2020, 2021» әлемдік байқауының іріктеу кезеңдеріне қатысушы.
1999-2012 жылдар аралығында қалалық, облыстық, республикалық пән олимпиадаларында 21 оқушысы; қалалық, облыстық, республикалық және халықаралық тарих, құқық, азаматтану пәндерінің конкурстарында, дебат сайыстарында 70-ге жуық оқушылары жүлдегер атанған.
Сонымен қатар, мектеп-гимназияның оқушылары халықаралық, республикалық, облыстық және қалалық деңгейдегі әр түрлі білім, өнер, спорттық байқаулар мен жарыстарда, пәндік олимпиадалар мен ғылыми жобалар жарыстарында 300-ге жуық, ұстаздары қалалық пәндік олимпиадалардан және әр түрлі деңгейдегі байқаулардан 100-ден астам жүлделі орындарды жеңіп алған.
