Шымкент қаласының әкімі Ғабит Сыздықбеков Қытай Халық Республикасының Сиань қаласынан келген жоғары деңгейлі делегациямен кездесу өткізді. Делегацияны Қытай Коммунистік партиясы Орталық комитетінің мүшесі, Сиань қалалық партия комитетінің хатшысы Хэ Вэньцюань бастап келді. Кездесу барысында екі қала арасындағы өзара тиімді серіктестікті кеңейту және жаңа бірлескен жобаларды іске асыру мәселелері жан-жақты қаралды.
Кездесудің негізгі мақсаты – Шымкент пен Сиань қалалары арасындағы сауда-экономикалық, инвестициялық және мәдени-гуманитарлық байланыстарды одан әрі нығайту, сондай-ақ өңіраралық ынтымақтастықтың жаңа бағыттарын айқындау болды. Қала әкімі тарихи Ұлы Жібек жолының бойында орналасқан екі қаланың географиялық және экономикалық тұрғыдан стратегиялық маңызы жоғары екенін атап өтті. Оның айтуынша, Шымкент халықаралық деңгейдегі ірі мегаполис әрі маңызды көлік-логистикалық хаб ретінде шетелдік инвестиция мен технология тартуға ерекше мән беріп отыр.
Кездесу барысында туризм мен көлік қатынастары саласын дамыту мәселелеріне ерекше назар аударылды. Бүгінде Шымкент пен Қытай қалалары арасында тікелей әуе рейстері тұрақты түрде орындалып келеді, бұл екі ел арасындағы іскерлік байланыстар мен туристік ағынның артуына оң әсер етуде. Тараптар осы бағыттағы ынтымақтастықты кеңейту қажеттігін атап өтті.
Сонымен қатар «Қытай – Орталық Азия» халықаралық мәдени-туристік пойызы жобасы аясында Шымкент қаласын маршрутқа енгізу мүмкіндігі талқыланды. Бұл бастама іске асқан жағдайда қала өңірлік және халықаралық туризмнің маңызды орталығына айналуына жол ашпақ.
Кездесу барысында білім беру және ғылым саласындағы ынтымақтастық мәселелері де қарастырылды. Атап айтқанда, академиялық алмасу бағдарламаларын кеңейту, студенттер санын арттыру және Сиань қаласындағы жоғары оқу орындарының бірінің филиалын Шымкент қаласында ашу мүмкіндігі жөнінде ұсыныстар айтылды. Бұл қадамдар екіжақты гуманитарлық байланыстарды күшейтуге ықпал етеді.
Бұдан бөлек, агроөнеркәсіптік кешен саласындағы инвестициялық жобалар талқыланды. Әсіресе заманауи технологияларды пайдалана отырып гүл өсіру, жылыжай шаруашылығын дамыту және экспортқа бағытталған өндірістерді кеңейту мәселелері назарға алынды. Қытайлық инвесторлар бұл бағыттағы жобаларға қызығушылық танытты.
Кездесу соңында қала әкімі делегация мүшелеріне сапарлары үшін алғыс білдіріп, Шымкент пен Сиань қалалары арасындағы серіктестікті одан әрі дамыту өзара тиімді нәтижелерге қол жеткізуге мүмкіндік беретінін атап өтті. Екі қала арасындағы байланыстардың нығаюы экономикалық өсімге, инвестиция тартуға және халықаралық ынтымақтастықтың жаңа деңгейге көтерілуіне ықпал етпек.
