Шымкент қаласының әкімі Ғабит Сыздықбеков көшпелі кездесулер аясында Еңбекші ауданына барып, Қойкелді батыр көшесі мен Оңтүстік, Айнатас және Достық шағынаудандарының тұрғындарымен жүздесті. Кездесудің негізгі мақсаты – жергілікті халықтың өзекті мәселелерін тыңдап, оларды шешу жолдарын бірлесе қарастыру және қаланың әлеуметтік-инфрақұрылымдық дамуына қатысты ұсыныстарды талқылау болды.
Жиын барысында тұрғындар ауданның дамуына қатысты бірқатар маңызды мәселелерді көтерді. Атап айтқанда, жер қатынастарына байланысты түйткілдер, ирригациялық жүйелердің жай-күйі, инженерлік инфрақұрылымға қосылу және жаңа желілерді тарту мәселелері кеңінен сөз болды. Сонымен қатар трансформаторлық қосалқы станциялардың техникалық жағдайы да назардан тыс қалған жоқ.
Тұрғындар тарапынан балалар мен спорт инфрақұрылымын дамытуға қатысты ұсыныстар да айтылды. Атап айтқанда, шағын футбол алаңдарын, балалар ойын алаңдарын салу және қолданыстағы спорт нысандарын жаңғырту мәселелері көтерілді. Бұл ұсыныстар аудан тұрғындарының өмір сапасын арттыруға бағытталған маңызды бастамалар ретінде қарастырылды.
Кездесу барысында салаға жауапты басқарма өкілдерімен бірлесіп бірқатар жобалар түсіндірілді. Атап айтқанда, Көксай ауданын жаңарту тұжырымдамасы және тұрғын үй қорын жаңғырту бағдарламасын іске асыру тетіктері туралы толық ақпарат берілді. Бұл жобалар ауданның келбетін жаңартуға және тұрғындардың тұрмыс жағдайын жақсартуға бағытталған.
Сондай-ақ жиында ұялы байланыс операторларының базалық станцияларын орнату, ішкі жолдарды кеңейту, жол белгілері мен жасанды жол кедергілерін орнату мәселелері де қарастырылды. Қала әкімі бұл бағыттағы жұмыстардың жүйелі түрде жүргізілуі тиіс екенін атап өтіп, жауапты басқармаларға нақты тапсырмалар жүктеді.
Ғабит Сыздықбеков аудан әкімдігі мен тиісті құрылымдарға тұрғындардан түскен өтініштерді дер кезінде қарау жұмыстарын күшейтуді тапсырды. Қала басшысы барлық атқарылып жатқан шаралар ең алдымен халықтың өмір сүру сапасын жақсартуға бағытталуы қажет екенін ерекше атап өтті.
Кездесу соңында қала әкімі тұрғындарға белсенді азаматтық ұстанымы, қаланың дамуына бейжай қарамайтын көзқарасы және ортақ іске қосқан үлесі үшін алғысын білдірді.
Айта кетейік, көшпелі кездесулер барысында түскен барлық ұсыныстар мен өтініштер жүйелендіріліп, тиісті салалық мекемелермен бірлесе пысықталғаннан кейін оларды кезең-кезеңімен шешуге бағытталған іс-шаралар жоспары әзірленеді.
