Шымкент қаласындағы «Ақтас» оқу полигонында әскери міндеттілермен арнайы оқу-жаттығу жиындары басталды. Іс-шара Мемлекет басшысының аумақтық қорғанысты ұйымдастыру жөніндегі тапсырмасы аясында өткізіліп, 50120 әскери бөлімінің базасында ұйымдастырылды.
Жиындарға Шымкент қаласының бес ауданынан шақырылған 150-ден астам әскери міндетті тартылды.
Жиындар әскери бөлімді жоғары жауынгерлік әзірлік деңгейіне келтіру және жеке құрамды қабылдау пунктін өрістетуден басталды. Он күн ішінде қатысушылар жауынгерлік даярлықтың негізгі пәндері бойынша теориялық білім алып, практикалық дағдыларды меңгереді.
Іс-шараның негізгі мақсаты – әскери міндеттілердің практикалық дағдыларын жетілдіру, жауынгерлік әзірлік деңгейін сақтау және оларды өз міндеттерін орындауға дайындау.
50120 әскери бөлім командирінің тәрбие және идеологиялық жұмыс жөніндегі орынбасары подполковник Мақсат Оспановтың айтуынша, сабақтар жауынгерлік даярлық жоспарына сәйкес тәжірибелі офицерлер, сержанттар мен нұсқаушылардың жетекшілігімен өткізіледі. «Ақтас» полигонында сапалы оқу өткізу үшін барлық қажетті жағдай жасалған: казармалар, асхана және оқу сыныптары жабдықталған.
Мұндай жиындардың тұрақты түрде өткізілетіні атап өтілді. Дайындық кезеңінде әскери міндеттілердің жұмыс орны мен жалақысы сақталады, сондай-ақ олар киім-кешекпен және тамақпен қамтамасыз етіледі.
Жиынның қорытынды кезеңінде «Стратегиялық нысандарды күзету және қорғау кезіндегі жеке құрамның іс-әрекеттері» тақырыбында тактикалық-арнайы оқу-жаттығу өткізіледі. Практикалық сабақтар барысында әскери қызметшілер блок-бекеттерге диверсиялық-барлау топтарының шабуылын тойтару әрекеттерін пысықтайды.
Шымкент гарнизонының баспасөз қызметі
