Шымкент қаласының жинақтау бекетінде Қарулы күштер қатарын жасақтау жоспары аясында 40 сарбазды салтанатты түрде шығарып салу рәсімі өтті. Олар бастапқы әскери дайындық курсынан өткен соң Қонаев қаласындағы десанттық-шабуылдау әскерлерінің әскери бөлімінде қызмет атқаратын болады.
Көктемгі шақыру науқанының жоспарына сәйкес, Шымкент қаласынан ҰҚК Шекара қызметіне 150 жас, Мемлекеттік күзет қызметіне 30 азамат, ал 4 сәуірден бастап Қарулы күштердің әскери бөлімдеріне 80 азамат медициналық және психологиялық комиссиядан өтіп, шақыру комиссиясының оң шешімімен жіберілді. 30 маусымға дейін мегаполистен тағы 1000-ға жуық азамат әскерге шақырылмақ.
Салтанатты шығарып салу рәсіміне қалалық әскери басқару органдарының басшылығы, ардагерлер кеңесінің төрағалары және құрметті қонақтар қатысты.
Жиналғандарға сөз сөйлеген қорғаныс істері жөніндегі департаменттің бастығы полковник Әбдіғабит Шегебаев, сарбаздарды әскери қызметтің басталуымен құттықтап, оларға зор денсаулық пен табысты қызмет тіледі:
– Әскери қызмет – әрбір азаматтың қасиетті борышы әрі еліміздің тыныштығының кепілі. Сапқа тұрып, қару алып, Отан алдындағы борышты орындау – әрбір ер-азамат үшін үлкен абырой. Сіздердің ел тыныштығын қорғауда адал қызмет ететін батыл жауынгер болатыныңызға сенім білдіреміз, – деді ол.
Әскери бөлім өкілдерінің айтуынша, сарбаздар әртүрлі әскери мамандықтарды меңгереді: БТР көздеушісі, оқшашар, гранататқыш, мерген, атқыш және басқа да бағыттар.
Болашақ жауынгерлерді қолдауға әскери-патриоттық клубтардың тәрбиеленушілері, «Жас Сарбаз» жастар қозғалысының өкілдері және Шымкент қаласындағы ҚР ҚМ Сабыр Рахымов атындағы әскери колледждің тәрбиеленушілері келді. Мерекелік көңіл-күйді гарнизонның әскери оркестрі айшықтай түсті.
Шымкент гарнизонының баспасөз қызметі
