1 ақпанда Қазақстанда халықты ерікті түрде кезең-кезеңмен вакцинациялау науқаны басталғаны белгілі. КВИ-ға қарсы екпе салу жұмыстары бірінші кезекте, коронавирустық инфекцияны жұқтыру және тарату қаупі жоғары халықтың осал топтары тартылады. Бірінші кезеңде инфекциялық ауруханалардың, жедел медициналық көмек, реанимация, БМСК, қабылдау бөлмелерінің медицина қызметкерлері, санэпидқызмет қызметкерлері вакцинациямен қамтылады. Осыған орай, бүгін алғаш рет Түркістан облысының санитариялық-эпидемиологиялық бақылау департаментінің 22 қызметкері қалалық емханада коронавирусқа қарсы «Спутник V» вакцинасын қабылдауды бастап кетті. Covid-19-ға қарсы екпенің 1-компонентін салдыруға департамент басшысының орынбасарлары, бөлім басшылары және т.б мамандар ниет білдірді. Дәрігерлер олардың денсаулықтарын тексеріп, екпе салдырғаннан кейінгі ережелерді түсіндірді. Екпе алғандар 30 минуттан аса дәрігерлердің бақылауында болды. Қазіргі таңда вакцинацияланған азаматтардың жағдайлары бірқалыпты, ешқандай шағымдары жоқ. Түркістан облысының санитариялық-эпидемиологиялық бақылау департаментінің қызметкерлері екінші компонентті 25-наурыз күні қабылдайды. Айтып өтейік, вакцинаны аудандардағы санитариялық-эпидемиологиялық бақылау басқармаларының өкілдері де салдыруда. «Спутник V» вакцинасы 18 жасқа дейінгі балаларға ұсынылмайды, себебі вакцинаны осы жас тобында қолдану әлі зерттелген жоқ. Вакцина тек кәмелетке толған, егуге қарсы көрсетілімдері жоқ адамдарға салынады. Алдымен дене температурасын өлшеу, эпидемиологиялық анамнезді жинау және дәрігердің міндетті тексеруі жүргізіледі. Егер дене температурасы 37°C-тан асса, вакцинация кейінге қалдырылады. Қазіргі кезде Түркістан облысында 1300 дәрігер екпе қабылдады. Наурыз айында полиция қызметкерлері мен білім саласының мамандарына салу жоспарланып отыр. Жақында ғана облысқа Гам-КОВИД-Вак («Спутник V») вакцинасының 8600 данасы жеткізілген.
Түркістан облысының санитариялық-эпидемиологиялық бақылау департаментінің баспасөз қызметі
