Түркістан қаласының әкімі Әзімбек Пазылбекұлы тұрғындарды жеке мәселелері бойынша қабылдау өткізді. Қабылдауға алдын ала жазылған 12 азамат қатысып, өздерін толғандырған әлеуметтік және тұрмыстық мәселелерді көтерді.
Атап айтқанда, жер қатынастары, тұрғын үймен қамту, әлеуметтік қолдау, мүмкіндігі шектеулі жандарға қажетті құрал-жабдықтармен қамтамасыз ету, инженерлік инфрақұрылым, жол және абаттандыру, еңбек даулары мен өзге де тұрмыстық мәселелерге қатысты арыз-шағымдарын білдіріп, өтініштерін жеткізді.
Әзімбек Пазылбекұлы кейбір мәселелер бойынша тиісті сала басшыларына нақты тапсырмалар жүктеп, жедел шешілуі мүмкін сұрақтар қабылдау барысында түсіндірілді. Ал қосымша зерделеуді қажет ететін өтініштер заңнама талаптарына сәйкес жан-жақты қаралып, бақылауда болатынын, әрбір азаматтың мәселесі назардан тыс қалмайтынын атап өтті.
Айта кетейік, Түркістан қаласы әкімінің азаматтарды жеке қабылдауы әр айдың үшінші сәрсенбісінде бекітілген кестеге сәйкес өткізіледі. Қабылдауға жазылу үшін «Е-Өтініш» ақпараттық жүйесі арқылы немесе Азаматтарды қабылдау орталығының (Фронт-офис) қызметіне жүгінуге болады.
