Шымкент – еліміздегі үшінші мегаполис ретінде көптеген әлеуметтік топтарды біріктіріп отыр. Қалада жастар саны көп, сонымен қатар шағын және орта бизнес те белсенді дамуда. Осындай ортада құқықтық сауаттылықтың төмен болуы кейбір әлеуметтік түйткілдерге жол ашады.
Мысалы, еңбек қатынастары, тұрғын үй және жер мәселелері, тұтынушылар құқығын қорғау, отбасы құқығы, интернет алаяқтықтары сынды бағыттарда азаматтардың құқықтық білімінің жеткіліксіздігі байқалады. Көптеген тұрғындар өз құқықтарын қорғау тетіктерін білмейді немесе мемлекеттік органдарға жүгінуге сенімсіздікпен қарайды.
Құқықтық ағартудың жаңа бағыттары
Шымкент қаласында халықтың құқықтық мәдениетін көтеру бағытында бірқатар игі шаралар қолға алынуда.
Мәселен, Шымкент қалалық Әділет департаменті, Прокуратура, Полиция департаменті, сондай-ақ жоғары оқу орындары мен қоғамдық ұйымдар бірлесе отырып, түсіндіру жұмыстарын жүйелі түрде жүргізіп келеді.
Жыл сайын қала мектептері мен колледждерінде «Құқық сабағы», «Заң білгірі» атты танымдық кездесулер ұйымдастырылады. Бұл жастарды ерте жастан құқықтық сауаттылыққа баулуға мүмкіндік береді.
Сонымен қатар, әлеуметтік желілер мен интернет платформалары арқылы онлайн кеңес беру, құқықтық подкасттар, бейнероликтер және инфографикалар тарату тәжірибесі де кеңінен қолданыла бастады.
Азаматтық қоғам мен БАҚ-тың рөлі
Құқықтық мәдениетті қалыптастыруда тек мемлекеттік органдар ғана емес, азаматтық қоғам институттары мен бұқаралық ақпарат құралдары да белсенді рөл атқаруы тиіс.
Газеттер мен телеарналар арқылы құқықтық тақырыптағы айдарлар ашу, нақты өмірлік мысалдар арқылы түсіндіру, құқық қорғау саласындағы жетістіктер мен мәселелерді талдау – тұрғындардың санасында заңға құрмет сезімін қалыптастырады.
Шымкенттегі жергілікті газеттер мен онлайн порталдарда «Азамат құқығы», «Заң және қоғам» айдарларын тұрақты түрде жүргізу – көпшіліктің құқықтық ой-өрісін кеңейтуге зор ықпал етеді.
Құқықтық мәдениет – қоғамның ортақ міндеті
Халықтың құқықтық мәдениетін арттыру – бұл тек заңгерлер мен мемлекеттік қызметшілердің ғана емес, бүкіл қоғамның ортақ міндеті. Әр азамат өзінен бастау алуы тиіс: заңды құрметтеу, қоғамдық тәртіпті сақтау, әділдік пен жауапкершілік қағидаттарын ұстану – құқықтық мәдениеттің көрінісі.
Құқықтық сауатты халық – мықты мемлекеттің кепілі.Сондықтан Шымкент қаласының тұрғындары арасында құқықтық білімді насихаттау, жастарға құқықтық тәрбие беру, цифрлық құқықтық кеңестер жүйесін дамыту – қаланың әлеуметтік тұрақтылығын қамтамасыз ететін маңызды бағыт болып қала береді.
Бүгінгі таңда Шымкент – заңға бағынған, құқықтық мәдениеті жоғары азаматтар қаласы болуға нық қадам жасап келеді. Бұл жолда әрбір шымкенттік өз үлесін қосса, әділетті және өркениетті қоғам құру ісі де баянды болмақ.
