Шымкент қаласында тұрғындардың құқықтық сауаттылығын арттырып, полициямен тиімді кері байланыс орнатуға бағытталған «Жолда қабылдау» республикалық акциясы өз жалғасын табуда. 3 қазан күні Әл-Фараби алаңында өткен кезекті шара барысында Шымкент қаласы Полиция департаментінің қызметкерлері таңғы сағат 09:00-ден кешкі 18:00-ге дейін жүзге жуық азаматты қабылдап, түрлі бағыттағы мәселелер бойынша құқықтық кеңес берді.
Қоғам мен полиция арасындағы ашық диалог
Акцияның басты мақсаты — халықпен ашық әрі шынайы диалог орнату, тұрғындарды толғандырған мәселелерге жедел ден қою және құқықтық көмек көрсету. Бұл жолы да тұрғындар тарапынан қойылған сұрақтардың ауқымы кең болды. Азаматтар негізінен әкімшілік құқықбұзушылықтар, жол-көлік оқиғалары, айыппұлдар мен көлік құралдарын тіркеу, жүргізуші куәлігін алу мен ауыстыру, көші-қон заңнамасы және басқа да құқықтық мәселелер жөнінде кеңес алды.
Әрбір азаматтың мәселесі — назарда
Полиция қызметкерлері әрбір келген тұрғынды жеке қабылдап, мәселесін тыңдап, толыққанды жауап беруге тырысты. Тұрғындардың кейбірі нақты оқиғалар бойынша құқықтық бағалау сұраса, енді бірі болашақта туындауы мүмкін жағдайлар бойынша кеңес алуға келді.
— Біз үшін ең маңыздысы — халықтың сенімі мен қолдауы. Осындай ашық шаралар арқылы азаматтардың құқықтық сауатын арттырып қана қоймай, олардың нақты мәселелеріне көмектесуге мүмкіндік аламыз, — дейді Шымкент қаласы Полиция департаментінің өкілдері.
«Жолда қабылдау» акциясы тек құқықтық кеңес берумен шектелмейді. Ол құқық қорғау органдары жұмысының ашықтығын қамтамасыз етіп, қоғамдағы өзекті мәселелерді дер кезінде анықтап, шешуге жол ашады. Азаматтардың өтініштері мен сұрақтары арнайы тіркеліп, ары қарай зерделеніп, тиісті органдардың қарауына жолданады.
Айта кетейік, акцияның келесі кезеңі 4 қазан күні Арбат аллеясында өтеді. Шараға келіп қатыса алмаған азаматтар үшін арнайы байланыс нөмірі де жұмыс істейді — 8 (700) 111 30 44. Бұл нөмір арқылы кез келген тұрғын өз сұрағын қойып, кеңес ала алады.
«Жолда қабылдау» — халық пен полиция арасындағы байланысты нығайтып, құқықтық мәдениетті қалыптастыруда маңызды рөл атқаратын шара. Мұндай акциялар тұрғындардың өз құқықтарын білуіне, заңсыз әрекеттерден қорғануына, сондай-ақ қоғамдағы құқықтық тәртіптің нығаюына оң әсерін тигізетіні сөзсіз.
