Республика күні мен Мемлекеттік егемендік туралы декларацияның 35 жылдығын мерекелеу аясында Шымкент қаласында үлкен маңызға ие республикалық пікірсайыс турнирі ұйымдастырылды. «Терең тарихтан – жарқын болашаққа!» деген атаумен өткен бұл зияткерлік сайыс жастар арасында белсенді азаматтық ұстаным қалыптастыруға, қоғамдағы маңызды мәселелерді жан-жақты талқылауға арналған.
Турнирдің ашылу салтанатына Шымкент қаласының әкімінің орынбасары Сәрсен Абайұлы Құранбек қатысып, қатысушыларға сәттілік тіледі. Қала әкімінің орынбасары жастарға үлкен сенім білдіріп, олардың пікірсайыс алаңында өздерін толық көрсете алатынына сенім артады деген ізгі тілегін жеткізді. Сонымен қатар, ол еліміздің болашағы – жастардың қолында екенін атап өтіп, олардың интеллектуалдық әлеуетін арттыруға бағытталған осындай іс-шаралардың маңыздылығын ерекше атап өтті.
Пікірсайыс турниріне еліміздің 9 өңірінен — Астана, Алматы қалалары мен Түркістан, Қызылорда, Ақтөбе, Қарағанды, Жамбыл және Батыс Қазақстан облыстарынан 120-дан астам команда қатысты. Бұл жастар пікірсайыс алаңында өз білімдері мен шешендік шеберліктерін сынға салып, түрлі тақырыптар бойынша өзара пікір алмасуда.
Жарыстың әділ және ашық өтуін қамтамасыз ету үшін Шымкент қаласындағы үш жоғары оқу орнынан іріктелген тәжірибелі пікірсайысшылар мен пікірсайыс қозғалысының аға буын өкілдері тартылған. Жалпы, шамамен 70 кәсіби төреші жарысты қадағалап, әділ баға беруде. Бұл сарапшылар құрамының болуы турнирдің жоғары деңгейде өтуіне кепілдік береді.
Турнир барысында қаралатын қарарлар қоғамның өзекті мәселелерін қамтиды. Пікірталастар технологияның дамуы, демократияның орнығуы, құқықтық мәдениеттің маңыздылығы, білім беру жүйесінің жетілдірілуі және жастар саясаты секілді бағыттарды қамтиды. Осы тақырыптар бойынша қатысушылар өз ойларын білдіріп, әртүрлі көзқарастарды талқылауда. Бұл жастардың сыни тұрғыдан ойлау қабілетін дамытуға, қоғамдық өмірдегі маңызды мәселелерді түсінуге мүмкіндік береді.
Республикалық пікірсайыс турнирі екі күнге жоспарланған және ертең өзінің қорытындысын шығарады. Сол күні жеңімпаздар анықталып, марапатталады. Бұл іс-шара жастардың өз әлеуетін көрсетуге, коммуникация және көшбасшылық дағдыларын дамытуға таптырмас мүмкіндік болып табылады.
Ұйымдастырушылар турнирдің жастар арасында пікірсайыс мәдениетін қалыптастыруда үлкен рөл атқаратынына сенімді. Осындай шаралар арқылы елдің болашағына жауапты, білімді және саналы азаматтар қалыптасып, қоғамның әртүрлі салаларында маңызды рөл атқарады деп күтілуде.
Сонымен қатар, «Терең тарихтан – жарқын болашаққа!» турнирі жастардың өз ойын ашық білдіруіне, қоғамдағы өзекті мәселелерге қызығушылығын арттыруға және патриоттық рухын шыңдауға бағытталған бірегей алаң болып отыр.
Бұл пікірсайыс турнирі – ел тарихына құрметпен қараудың, жастар арасындағы азаматтық белсенділікті арттырудың және қазақ қоғамының рухани дамуының көрінісі іспеттес. Алдағы уақытта да осындай масштабты интеллектуалдық шаралардың тұрақты түрде өтуі жастардың сапалы білім алуына және қоғамға пайдалы тұлға ретінде қалыптасуына ықпал ететіні анық.
