Шымкент қаласында есірткі қылмысына қарсы жүргізіліп жатқан жедел алдын алу шаралары барысында аса ірі көлемде синтетикалық есірткі заттары тәркіленіп, бірнеше күдікті қолға түсті. Бұл деректер «Қарасора-2025» жедел-профилактикалық іс-шарасы аясында тіркеліп отыр.
Аталған операция Шымкент қаласы Полиция департаментінің Есірткі қылмысына қарсы іс-қимыл басқармасының бастамасымен өткізілді. Мақсат — заңсыз есірткі айналымының жолын кесу, сондай-ақ синтетикалық психотроптық заттардың жастар мен жасөспірімдер арасында таралуының алдын алу.
Жедел ақпарат негізінде қолға алынған іс-шара барысында полицейлер қала аумағында есірткі тасымалымен айналысты деген күдікпен екі шетел азаматын ұстады.
Тексеру кезінде олардың жалға алған автокөлігінен сатуға дайын күйде оралған “мефедрон” психотроптық заты салынған 22 пакет табылып, тәркіленді.
Тек көліктен ғана емес, күдіктілер алдын ала дайындаған бірнеше жасырын орындардан қосымша 46 орама есірткі заты алынды. Сараптама қорытындысы бойынша тәркіленген заттың жалпы салмағы 200 грамнан асқан, бұл — заң бойынша аса ірі көлем саналады.
Түркістан облысының тұрғыны ұсталды
Сондай-ақ жедел іс-шаралар жалғасып, нәтижесінде Түркістан облысының 20 жастағы тұрғыны ұсталды. Одан шамамен 70 грамм “мефедрон” табылды, ол есірткіні жеке тұтынуға емес, сатуға арнап дайындағанын мойындаған.
Бұдан бұрын, қыркүйек айында, синтетикалық есірткілерді таратуға қатысы бар деген күдікпен жергілікті тұрғын ұсталған болатын. Тергеу барысында оның аса ірі көлемде психотроптық заттар дайындап, таратпақ болғаны анықталған.
Аталған деректер бойынша ҚР Қылмыстық кодексінің 297-бабы (Есірткі, психотроптық заттарды өткізу мақсатында заңсыз сақтау, тасымалдау, тарату) бойынша сотқа дейінгі тергеу амалдары басталды.
Барлық күдіктілер уақытша ұстау изоляторына қамауға алынған.
Құқық қорғаушылардың ескертуі
Шымкент қаласы Полиция департаменті тұрғындарға есірткі заттарының заңсыз айналымы үшін Қазақстан Республикасының заңнамасына сәйкес қатаң қылмыстық жауапкершілік қарастырылғанын ескертеді.
– «Синтетикалық есірткі – қоғам үшін аса қауіпті. Бұл заттардың таралуы әсіресе жастар арасында денсаулыққа, болашаққа кері әсерін тигізеді. Сондықтан тұрғындарды мұндай әрекеттерден аулақ болуға, күдік тудыратын жағдайлар туралы бірден полицияға хабарлауға шақырамыз», – делінген полиция департаментінің ресми хабарламасында.
«Қарасора-2025» секілді жедел-профилактикалық іс-шаралар қоғамдық қауіпсіздікті қамтамасыз ету, есірткі бизнесіне тосқауыл қою және салауатты ұрпақ тәрбиелеу бағытында маңызды рөл атқарады. Мұндай шаралар алдағы уақытта да тұрақты жалғасын таппақ.
