Шымкент қаласында қазан айы – ерекше мейрамдарға толы. Айдың алғашқы күнінен бастап қалада қарттар мен ұстаздарға, құтқарушылар мен мемлекет мерекесіне арналған бірқатар салтанатты шаралар ұйымдастырылады. Бұл туралы бүгін Шымкент қаласы әкімдігінің ресми өкілі, қала әкімінің орынбасары Сәрсен Абайұлы Құранбек мәлімдеді.
1 қазан – Халықаралық қарттар күні
Қазан айының алғашқы күні – дәстүрлі түрде қарттарымызға құрмет көрсету күні. Осы орайда қалада қарттар үйлерінде арнайы концерттік бағдарламалар өтсе, негізгі салтанатты жиын сағат 12:00-де «Royal Rose» мейрамханасында ұйымдастырылады.
Мерекеге түрлі салада еңбек етіп, елге сіңірген еңбегімен танылған 200-ден астам ардагер шақырылып отыр. Олар үшін мерекелік дастархан жайылып, естелік сыйлықтар мен алғыс хаттар табысталмақ.
— Қарттар – біздің өткеніміздің айнасы, қоғамның алтын қазынасы. Олар ел дамуының әр кезеңінде ерен еңбек еткен азаматтар. Біз олардың еңбегін ешқашан ұмытпауымыз керек, – деді қала әкімінің орынбасары Сәрсен Құранбек.
5 қазан – Ұстаздар күні
Ұлт болашағы – ұстаздың қолында. Осы орайда 3 қазан күні сағат 11:00-де «Қызғалдақ» сарайында Ұстаздар күніне арналған салтанатты жиын өтеді. Шарада:
-
Жергілікті өнерпаздар мен жастар ұстаздарға арнау концертін ұсынады;
-
Қаладағы білім беру саласының үздік өкілдеріне марапаттар мен алғыс хаттар табысталады;
-
«Үздік педагог», «Жыл мұғалімі» секілді номинациялар бойынша сыйлықтар беріледі.
Бұл – тек кәсіби мереке ғана емес, ұстаздың қоғамдағы мәртебесін көтеруге арналған маңызды қадам.
19 қазан – Құтқарушылар күні
Қауіп пен қатерде қызмет ететін мамандар – ел қорғаны. 19 қазан күні, Қазақстан Республикасы Төтенше жағдайлар министрлігінің құрылғанына 30 жыл толуына орай, Шымкентте Құтқарушылар күніне арналған мерекелік шара ұйымдастырылады. Іс-шара «Қызғалдақ» сарайында өтеді.
Биылғы мереке ерекше форматта өтпек. «30 жылдыққа – 30 игі іс» республикалық акциясы аясында шымкенттік құтқарушылар:
-
Қарттар үйлеріне барып, көмек көрсетуде;
-
Балаларға арналған танымдық-тәрбиелік кездесулер өткізуде;
-
Табиғат пен жануарларды қорғау акцияларына қатысуда.
Салтанатты жиында ардагер құтқарушылар мен қазіргі қызметкерлерге құрмет көрсетіліп, мерекелік концерт ұсынылады.
25 қазан – Республика күні
Еліміздің басты мемлекеттік мерекелерінің бірі – 25 қазан – Республика күні биыл да жоғары деңгейде аталып өтпек. Шымкентте бұл мейрам екі күн бойы, 24–25 қазан аралығында өтетін іс-шаралармен ерекшеленеді.
24 қазан:
-
«Қызғалдақ» сарайында салтанатты жиын ұйымдастырылады;
-
Ел дамуына елеулі үлес қосқан азаматтарға мемлекеттік және жергілікті марапаттар, «Құрметті азамат» атағы табысталады;
-
Шараны жергілікті өнер иелері мен жас таланттар көркемдейді.
-
25 қазан:
-
Астана алаңында сағат 20:00-де ашық аспан астында гала-концерт өтеді;
-
Елге танымал эстрада жұлдыздары мен Шымкенттің өнерпаздары мерекелік көңіл-күй сыйлайды;
-
Қала тұрғындарына арналған отбасыдық, мәдени және спорттық бағдарламалар күн бойы ұйымдастырылады.
Мереке – елдік пен бірліктің символы. Республика күні аясында өтетін іс-шаралар тек көңіл көтеру ғана емес, Отанға деген мақтаныш сезімін нығайтуға бағытталған.
Қала тұрғындарына ашық шақыру
Қала әкімдігі қазан айындағы барлық мерекелік іс-шараларға барлық шымкенттіктер мен қала қонақтарын белсенді түрде қатысуға шақырады. Шаралар еркін форматта, көпшілікке қолжетімді болады.
— Қазан – руханият пен құрметтің айы. Қоғамның барлық өкілдеріне арналған шаралар – біздің ортақ құндылықтарымыздың айқын көрінісі. Барша тұрғындарды осы мерекелік кезеңде бірге болуға, қуанышты сәттермен бөлісуге шақырамыз, – деп қорытындылады Сәрсен Құранбек.
