Шымкент қаласында «Учаске» жедел-профилактикалық іс-шарасы аясында интернет алаяқтықпен күрес жұмыстары күшейтілді. Іс-шараның басты мақсаты — тұрғындар арасында қаржылық сауаттылықты арттыру, интернет-алаяқтықтың алдын алу және азаматтардың жеке деректерін қорғауға қатысты түсіндіру жұмыстарын жүргізу.
Аталған бағыттағы жұмыстарды Шымкент қаласы Полиция департаментінің Еңбекші аудандық Полиция басқармасының қызметкерлері белсенді түрде жүзеге асыруда. Полицейлер халық көп шоғырланатын орындарда — базарлар, халыққа қызмет көрсету орталықтары, банктер маңында, қоғамдық көлік аялдамаларында және аулаларда арнайы түсіндіру парақшаларын таратып, ауызша нұсқаулықтар беруде.
Интернет-алаяқтық — заманауи қылмыстың ең қауіпті түрі
Қазіргі таңда интернет алаяқтарының әрекет ету тәсілдері күн сайын түрленіп, азаматтарды алдау жолдары да күрделеніп келеді. Полицейлер атап өткендей, алаяқтар көбінесе:
-
банктің атынан хабарласу арқылы жеке деректерді алуға тырысады;
-
«оңай ақша табу», «жеңіл несие» немесе «инвестициялық жоба» деген сылтаумен сілтемелер жібереді;
-
интернет-дүкендер арқылы жалған тауарлар сатады;
-
әлеуметтік желілерде жалған ұтыс ойындарын ұйымдастырады;
-
мемлекеттік органдар немесе полиция атынан хабарласып, ақша талап етеді.
Мұндай алаяқтық түрлері азаматтардың шоттарындағы қаржыны заңсыз иемденуге, жеке деректерін ұрлауға бағытталған.
Қаржылық қауіпсіздік – әр азаматтың жауапкершілігі
Полиция қызметкерлері тұрғындарға ешқашан бейтаныс нөмірлерден келген сілтемелерге өтпеу, ешкімге банк картасының нөмірін, CVV кодын, SMS-кодтарды бермеу, жалған сайттардан тауар сатып алмау сынды маңызды ескертулер жасап, қарапайым сақтық шараларын ұстануға кеңес беруде.
Сондай-ақ, құқық қорғаушылар балалар мен зейнеткерлердің де интернет кеңістігінде жиі алаяқтарға алданып қалатынын айтып, отбасында цифрлық қауіпсіздік туралы жиі сөйлесіп отырудың маңыздылығын атап өтті.
Тұрғындармен тығыз байланыс орнатылуда
Түсіндіру жұмыстары барысында полицейлер қала тұрғындарымен бетпе-бет кездесіп, нақты мысалдар арқылы интернет алаяқтарының әрекетін әшкерелеуде. Жұртшылыққа күнделікті өмірде сақтық танытып, күмәнді жағдай туындаса, бірден 102 нөміріне немесе Полиция басқармасына жүгіну қажеттігі ескертілуде.
Сонымен қатар, тұрғындарға таратылып жатқан жадынамаларда интернет-алаяқтықтың кең таралған түрлері мен олардан қорғану жолдары қысқаша әрі түсінікті тілде жазылған.
«Учаске» жедел-профилактикалық іс-шарасы аясындағы бұл жұмыстар қала тұрғындарының құқықтық және қаржылық сауаттылығын арттыруда маңызды рөл атқарып отыр. Шымкент қаласының Полиция департаменті азаматтарды интернеттегі кез келген ұсынысқа сын көзбен қарап, күмән туындаған жағдайда полицияға жүгінуге шақырады.
Бүгінгі цифрлық заманда ақпараттық қауіпсіздік пен абай болу – әр адамның өз қолында екенін ұмытпаған жөн.
