Шымкент қаласында аса маңызды стратегиялық нысандарды қорғау бағытындағы оқу-жаттығулар жүйелі түрде өткізіліп келеді. Соның аясында соңғы уақытта «Бадам» суқоймасында арнайы оқу-жаттығу өткізілді. Бұл жаттығу аумақтық қорғаныс бригадасының күзет ротасының және әскери міндеттілердің қатысуымен жүзеге асты.
«Бадам» суқоймасы – мемлекеттік маңызы бар стратегиялық нысан саналады. Мұнда 62 миллион текше метр су жиналады, сондықтан оның қауіпсіздігін қамтамасыз ету – мемлекет пен қаланың басты міндеттерінің бірі. Осындай маңызды нысанды қорғауда ерекше дайындық пен жоғары деңгейдегі кәсіби шеберлік талап етіледі.
Оқу-жаттығудың басты мақсаты – стратегиялық маңызы бар объектілердің қауіпсіздігін қамтамасыз ету, кез келген төтенше жағдайға дайын болу және қауіп төнген жағдайда жедел әрі тиімді әрекет ету дағдыларын жетілдіру. Сонымен қатар, оқу барысында қатысушылар арасында үйлесімділік пен командалық жұмыс дағдыларын дамыту көзделді.
Іс-шараға Шымкент қаласы әкімінің орынбасары Берік Беркімбаев қатысты. Оның сөзінше, мұндай оқу-жаттығулар қаланың қауіпсіздігін нығайтып, тұрғындардың тыныштығын қамтамасыз етуге бағытталған маңызды шара болып табылады.
Жаттығу сценарийі бойынша, «Бадам» суқоймасын күзетіп жүрген бөлімшеге қауіп төнген жағдайда оны қорғау және тойтарыс беру іс-шаралары пысықталды. Атап айтқанда:
-
Күзет және қорғаныс әрекеттерін ұйымдастыру;
-
«Жараланғандарға» алғашқы медициналық көмек көрсету;
-
Өрт сөндіру бойынша жедел іс-қимыл;
-
Жергілікті аумақты тінту және қылмыскерлерді ұстап, жеткізу;
-
Қару-жарақтың және техниканың жағдайын тексеру;
Бұл міндеттер оқу-жаттығудың әр кезеңінде мұқият әрі жүйелі түрде орындалды.
Шымкент қаласы аумақтық қорғаныс бригадасының командирі, полковник Бақытжан Әшімов оқу-жаттығу туралы өз пікірін білдіріп, оның маңыздылығын атап өтті:
— «Бұл оқу-жаттығулар аумақтық әскерлердің, полицияның, ІІМ арнайы бөлімшелерінің және әкімдіктің бірлескен жұмысын, жоғары дайындық деңгейін нақты көрсетті. Қала мен өңірдегі аса маңызды инфрақұрылымды кез келген қауіптен сенімді қорғау үшін осындай жаттығулар өте қажет. Тәжірибе барысында жетілдірілген тактикалық іс-қимылдар қауіп төнген жағдайда жедел әрі тиімді әрекет етуге мүмкіндік береді», — деді полковник.
«Бадам» суқоймасын қорғау бойынша оқу-жаттығу – мемлекеттік маңызы бар стратегиялық объектілердің қауіпсіздігін қамтамасыз етуге бағытталған кешенді шаралардың бір бөлігі. Мұндай жаттығулар қауіпсіздік саласындағы ұйымдардың үйлесімді жұмысын нығайтып, кез келген төтенше жағдайға дайын болуға септігін тигізеді.
Алдағы уақытта да Шымкент қаласында аса маңызды нысандарды қорғау бойынша оқу-жаттығулар жүйелі түрде жалғасын табатын болады. Бұл өз кезегінде қала мен оның тұрғындарының тыныштығын қамтамасыз етуде үлкен маңызға ие.
