Шымкент қаласында жастар арасында құқықтық мәдениетті қалыптастыру, құқық бұзушылықтың алдын алу және олардың салдарын терең түсіндіру мақсатында кешенді іс-шара ұйымдастырылды. Жуырда М.Әуезов атындағы Оңтүстік Қазақстан университетінде өткен бұл кездесуге құқық қорғау органдарының өкілдері, оқу орнының оқытушылары, студенттер мен арнайы қонақтар қатысты.
Іс-шара Қазақстан Республикасының Бас прокуратурасының тапсырмасы негізінде жүзеге асырылды. Негізгі мақсат – жастардың құқықтық сауатын көтеру, оларды заң алдындағы жауапкершілікпен таныстыру және құқық бұзушылыққа итермелейтін қауіп-қатерлерден сақтау.
Кездесу барысында студенттерге құқық бұзушылық дегеніміз не, оның қандай түрлері бар және әрқайсысы үшін заңмен қандай жауапкершілік қарастырылғаны туралы толыққанды ақпарат берілді. Бұл бағытта нақты мысалдар келтіріліп, өмірден алынған шынайы оқиғалар негізінде құқық бұзушылықтың салдары мен оның адам өміріне тигізетін әсері егжей-тегжейлі талқыланды.
Шымкент қаласы прокурорының аға көмекшісі Қайсар Қалдабаев өз сөзінде жастар арасындағы құқық бұзушылық статистикасына тоқталды. Оның айтуынша, 2024 жылы жастардың қылмысқа бару деңгейі 4,2%-ға артқан.
«Әсіресе синтетикалық есірткіні тарату, оны сақтау, қолдану және интернет пен әлеуметтік желілер арқылы жасалатын алаяқтық әрекеттер белең алуда. Бұл қылмыстар үшін ҚР заңнамасында өте қатаң жазалар қарастырылған. Мысалы, синтетикалық есірткі саудасы ауыр қылмыс саналады және ұзақ мерзімді бас бостандығынан айыру жазасына әкеп соғуы мүмкін», — деді ол.
Сонымен қатар, Қалдабаев қалада құқық бұзушылықтың алдын алу мақсатында 71 мобильді топ құрылғанын, олардың қатысуымен 469 рейдтік шара ұйымдастырылғанын атап өтті. Тек биылдың өзінде 4800-ден астам түнгі уақытта бей-берекет жүрген жасөспірім анықталып, тиісті ескерту және түсіндіру жұмыстары жүргізілген.
Кездесуге арнайы шақырылған бокстан Қазақстан Республикасына еңбек сіңірген спорт шебері Біржан Жақыпұлы жастарға мотивациялық сөз арнап, спорт пен тәртіптің өмірдегі орнын ерекше атап өтті.
«Зиянды әдеттерден аулақ болу – адамның болашағына жасалатын ең үлкен инвестиция. Ал спорт – тек денсаулық кепілі емес, ол ерік-жігерді, тәртіпті, мақсатқа ұмтылуды қалыптастырады», — деді спорт шебері.
Ол жастарды салауатты өмір салтын ұстануға, бос уақытты тиімді пайдалануға және өмірлік мақсаттарға дұрыс бағытта ұмтылуға шақырды.
Шара аясында студенттер мен қатысушыларға құқықтық мәдениетті көтеруге арналған ақпараттық парақшалар таратылып, интерактивті сұрақ-жауап сессиясы ұйымдастырылды. Студенттер құқық қорғау саласының мамандарына өздерін қызықтырған сұрақтарын қойып, нақты әрі пайдалы жауаптар алды.
Құқық қорғау органдарының өкілдері жастарға заңды бұзбай, құқықтық нормалар шеңберінде өмір сүрудің маңызын түсіндіріп, қажет болған жағдайда қайда жүгінуге болатынын нақтылап өтті.
Осындай іс-шаралар жастар арасында құқықтық сана мен азаматтық жауапкершілікті қалыптастыруға бағытталған маңызды бастама болып отыр. Құқық бұзушылықтың алдын алу – тек құқық қорғау органдарының ғана емес, бүкіл қоғамның ортақ міндеті. Мұндай кездесулер мен ақпараттық түсіндіру жұмыстары жастарды теріс әрекеттерден сақтап, оларды өз болашағына жауапкершілікпен қарауға тәрбиелейді.
Алдағы уақытта Шымкент қаласы әкімдігі мен құқық қорғау органдары жастармен түсіндіру жұмыстарын мектептер мен колледждерде, сондай-ақ шағын аудан деңгейінде жалғастыруды көздеп отыр.
«Жастар – ел болашағы. Оларды тәрбиелеу – мемлекеттің ең маңызды миссияларының бірі», — дейді ұйымдастырушылар.
