Астана төрінде кезекті рет өткен Әлемдік және дәстүрлі діндер лидерлерінің Съезі – бүгінгі әлемдегі бейбітшілік пен келісімнің аса маңызды диалог алаңына айналып отыр. Биылғы жиынға қатысқан рухани көшбасшылар мен халықаралық делегациялар бір мақсатты – жаһандық тұрақтылық пен татулықты нығайту жолындағы үнқатысу мен өзара құрметті алға шығарды.
Қазақстан Президенті Қасым-Жомарт Тоқаев Съездің ашылуында сөз сөйлеп, әлемнің түкпір-түкпірінен келген беделді қонақтарға ілтипат білдіріп, жаһандық сын-қатерлер жағдайында олардың бейбітшілік пен диалогты дәріптеуге қосқан үлесін жоғары бағалады.
«Қазір жер жүзінде сын-қатерлер көбейіп, халықаралық ахуал ушығып тұр. Соның салдарынан түрлі қақтығыстар көбеюде. Алмағайып кезең ешкімге оңай болып жатқан жоқ. Өкінішке қарай, соғыстың сипаты мен болмысы белең алуда», – деді Мемлекет басшысы.
Қасым-Жомарт Тоқаевтың айтуынша, қазіргі турбулентті геосаяси жағдай кезінде түрлі дін мен ұлт өкілдерінің өзара түсіністігі мен құрметі бұрынғыдан да маңызды бола түсті. Президент Съезге қатысушыларды «Бейбітшілік елшілері» деп атап, олардың ұстанып отырған гуманистік ұстанымдарын жоғары бағалады.
«Сіздер ортақ мүдде үшін бірігіп, әлем жұртшылығын игі мақсат жолында жұмылдыруға ниет білдіріп отырсыздар», – деді Мемлекет басшысы.
Шындығында, дін басшылары – тек рухани көшбасшылар ғана емес, сонымен бірге әлемдік қоғамдастыққа адамгершілік пен төзімділік құндылықтарын насихаттайтын маңызды тұлғалар. Олар арасындағы диалог — қақтығыстардың алдын алып, сенім мен татулықтың негізін қалайтын іргетас.
Президент Тоқаев Съезд қызметінің басталған сәтінен бастап бүгінге дейінгі атқарылған маңызды жұмыстарды атап өтті. Осы жылдар аралығында Астанадағы бұл диалог алаңы тек Қазақстанның ғана емес, бүкіл әлемнің рухани капиталына айналды.
Съезд барысында қабылданған ұсыныстар негізінде арнайы 2033 жылға дейінгі даму тұжырымдамасы әзірленген. Бұл құжат Съездің институционалды дамуына, оның аясында қабылданатын шешімдер мен үндеулердің халықаралық деңгейде ықпалды болуына жол ашып отыр.
«Аталған құжат – біздің бейбітшілікті сақтау, тату-тәтті өмір сүру және баршаға ортақ адамгершілік құндылықтарын берік орнықтыру секілді ортақ мақсатымызды айқындайды», – деді Президент.
Съездің қорытынды декларациясы енді БҰҰ Бас Ассамблеясының ресми құжаты ретінде таратылады. Бұл – халықаралық қауымдастықтың Съезд жұмысына берген жоғары бағасының дәлелі. Президент Тоқаев келесі мерейтойлық 80-ші сессияда да осы үрдіс жалғасатынына үміт білдірді.
Әлемдік және дәстүрлі діндер көшбасшыларының Съезі – Қазақстанның сыртқы саяси және рухани брендтерінің бірі. Бұл форум елордамыз Астананы диалог пен татулықтың астанасына айналдырып, Қазақстанның халықаралық бейнесін одан әрі нығайтты.
Президент Тоқаев айтқандай, бүгінгі күрделі заманда бейбітшіліктің баламасы жоқ. Диалог, өзара түсіністік пен келісім – адамзат өркениетінің ілгерілеуіне апарар жалғыз жол. Қазақстан дәл осы жолды таңдап, бүкіл әлемге ынтымақ пен бейбіт қатар өмір сүрудің үлгісін көрсетіп келеді.
Астанада өткен бұл маңызды жиын – рухани көшбасшылардың ғана емес, бүкіл адамзаттың ортақ үнін жеткізген, бейбітшілік пен тұрақтылықты дәріптеген тарихи оқиға. Қазақстан бастамашы болған бұл платформа тек еліміз үшін емес, бүкіл әлем үшін маңызды. Осы Съездің арқасында рухани келісім мен жаһандық үнқатысу үміті жаңғырып, татулықтың жаңа парағы ашылуда.
