2025 жылдың 18 тамызы күні А.С. Пушкин атындағы Шымкент қалалық әмбебап ғылыми кітапханасында әйелдерге арналған ерекше әрі маңызға ие бастама – «ӘЙЕЛ. ҚҰҚЫҚ. ҚОРҒАНЫС» атты бес күндік семинар-тренингтің алғашқы күні өтті.
Бұл курс – қоғамдағы әйелдердің құқықтық сауаттылығын арттыру, олардың жеке қауіпсіздігін қамтамасыз ету және түрлі қауіп-қатер жағдайында қорғана білу қабілеттерін дамыту мақсатында ұйымдастырылған. Курс Шымкент қаласы әкімдігінің қолдауымен, құқық қорғау, білім беру және әлеуметтік саладағы мамандардың белсенді қатысуымен өтуде.
Курстың алғашқы күні: теория мен тәжірибенің үйлесімі
Курс алғашқы күннен-ақ қатысушылардың ерекше қызығушылығын туғызып, қызу талқылауға толы болды. Семинар-тренинг форматында өткен жиын барысында қатысушылар зорлық-зомбылықтың түрлері, оның психологиялық және әлеуметтік салдары, сондай-ақ құқықтық қорғану тетіктері туралы жан-жақты ақпарат алды. Сонымен қатар, медиация ұғымы, оның қоғамда дау-жанжалдарды шешудегі тиімділігі туралы да кең мағлұмат берілді.
Курс барысында қатысушылармен екі білікті маман – психолог, педагог-тренер, жеке кәсіпкер Боранбек Алтынбек Срайылұлы және заңгер, кәсіби медиатор Кесебай Айжан Өмірзаққызы кездесіп, өз салалары бойынша терең әрі пайдалы ақпаратпен бөлісті. Мамандар қатысушылардың сұрақтарына жауап беріп, тәжірибелік кейстер арқылы нақты жағдайларды талдап өтті.
Қатысушыларға қолайлы жағдай жасалды
Іс-шара барысында әйелдер өзара пікір алмасып, ортақ мәселелерді ашық талқылауға мүмкіндік алды. Сонымен қатар, қатысушылар үшін арнайы ұйымдастырылған кофе-брейк бейресми атмосферада еркін сұхбат құруға және байланыс орнатуға жағдай жасады.
Келесі кезең: өзін-өзі қорғаудың практикалық дағдылары
Курс бес күнге жоспарланған. Алдағы күндерде қатысушылар өзін-өзі физикалық тұрғыда қорғауға арналған арнайы практикалық сабақтардан өтеді. Бұл сабақтарды кәсіби жаттықтырушылар мен қауіпсіздік саласындағы мамандар өткізеді. Олар нақты қауіп төнген жағдайда қалай әрекет ету керектігін, шабуыл жасаушыдан қорғану, қауіпсіз қашықтық сақтау, алаңнан шығу әдістері, қолды босату, дауыспен көмек шақыру, стресстік жағдайдағы өзін бақылау сияқты дағдыларды үйретеді.
Мақсат – әйелдердің сенімділігі мен қауіпсіздігі
Курстың басты ерекшелігі – тек құқықтық және физикалық қорғану ғана емес, психологиялық сенімділікті арттыру. Бүгінде көптеген әйелдер өз құқықтарын толық білмегендіктен немесе қорқыныштың салдарынан әділет іздеуге қадам жасай алмай жатады. Осы курстың мақсаты – оларды рухани тұрғыда қолдау, өз құқығын қорғауға жігерлендіру және қоғамда өз орнын сенімді ұстануға жол ашу.
Ұйымдастырушылардың айтуынша, бұл курс – бір реттік шара емес. Алдағы уақытта да құқықтық мәдениетті көтеру, әйелдердің қауіпсіздігін арттыру, және гендерлік теңдікке бағытталған осындай бастамалар тұрақты түрде ұйымдастырылып отырады.
«ӘЙЕЛ. ҚҰҚЫҚ. ҚОРҒАНЫС» курсы – нәзік жандыларға тек заңды білуге емес, сонымен қатар өмірде өз қауіпсіздігін қамтамасыз етіп, батыл әрі сенімді болуға мүмкіндік беретін ауқымды бастама. Қатысушылар бұл курстан алған білім мен тәжірибені күнделікті өмірде еркін қолдануға мүмкіндік алады. Бұл – әйелдердің әл-ауқатын арттыру жолындағы нақты қадам.
