Мемлекеттік мүліктің тиімді пайдалануы мен азық-түлік бағаларын тұрақтандыру мәселелері Шымкент қаласының әкімдігінде кеңінен қарастырылды. Қала әкімінің Ғабит Сыздықбековтің төрағалығымен өткен аппараттық мәжілісте мемлекеттік мүлікті жалға беру үрдісі, тәркіленген коммуналдық меншікке қабылданған мүліктердің жағдайы және әлеуметтік маңызы бар азық-түлік тауарларының бағаларын тұрақтандыруға бағытталған кешенді шаралар талқыланды.
Қаржы басқармасының басшысы Рүстем Бақтыбаев баяндағандай, биылғы жылдың басынан бері қалада жалпы ауданы 23,7 мың шаршы метрді құрайтын 183 нысан жай жалға берілген. Бұдан бөлек, 63 нысан ғимараттары жоқ мекемелерді орналастыру және білім беру ұйымдарында алғашқы медициналық көмек көрсету кабинеттерін ұйымдастыру мақсатында 22,1 шаршы метр кеңістік тегін негізде мүліктік жалдауға берілген. Бұл жұмыстардың нәтижесінде биылғы жылы бюджетке түсетін түсімдер жоспары 200 миллион теңге болып белгіленсе, қазіргі таңда нақты түсім 139,3 миллион теңге, яғни жоспардың 69,6%-ы орындалған. Бұл қаржылық көрсеткіштер мемлекеттік мүлікті тиімді пайдалану бағытындағы жұмыстардың жүйелі жүргізіліп жатқанын көрсетеді.
Сонымен қатар, ауыл шаруашылығы және ветеринария басқармасының басшысы Талғат Мекамбаев әлеуметтік маңызы бар азық-түлік тауарларының бағаларын тұрақтандыру бойынша атқарылып жатқан кешенді іс-шараларға егжей-тегжейлі тоқталды. Қала тұрғындары жылына шамамен 600 мың тонна әлеуметтік маңызы бар азық-түлік өнімдерін тұтынады. Бұл өнімдер қатарына нан, ұн және рожки сияқты негізгі азық-түлік тауарлары толық көлемде — 100% қамтамасыз етілуде.
Қала өзінің ет өнімдері бойынша қажеттілігінің тек 17%-ын ғана қамтамасыз ете алады, қалған қажеттілік Түркістан облысынан тасымалданады. Көкөніс өнімдері де толықтай өзімізде өндіріле қоймайды, сондықтан басқа өңірлер мен елдерден жеткізіледі. Мысалы, картоп Павлодар, Түркістан облыстарынан, сондай-ақ Қытай және Ресей Федерациясынан, пияз — Жамбыл, Түркістан облыстарынан және Өзбекстан Республикасынан, сәбіз — Павлодар, Жамбыл, Түркістан облыстарынан және Ресей Федерациясынан, ал қырыққабат Түркістан облысы мен Өзбекстан Республикасынан тасымалданады. Бұл көрсеткіштер азық-түлік қауіпсіздігін қамтамасыз етуде өңірлер мен көршілес елдер арасындағы экономикалық байланыстардың маңызын көрсетеді.
Қалада әлеуметтік маңызы бар азық-түлік тауарларын қолжетімді бағамен ұсыну мақсатында әлеуметтік сауда желісін дамыту жұмыстары белсенді жүргізілуде. Осы орайда, «Грамад» сауда желісі тарапынан «Бақша» атты 14 әлеуметтік дүкен ашылды. Бұдан басқа, тағы 10 сауда нүктесін ашу жұмыстары жалғасуда. Бұл шаралар халықты азық-түлік өнімдерімен тиімді және қолжетімді бағада қамтамасыз етуге зор мүмкіндік береді.
Аппараттық мәжілісте атап өтілгендей, мемлекеттік мүлікті тиімді пайдалану және әлеуметтік азық-түлік бағаларын тұрақтандыру бағытындағы жүйелі шаралар қала тұрғындарының әл-ауқатын арттыруға, әлеуметтік тұрақтылықты қамтамасыз етуге және экономикалық даму үрдістерін жеделдетуге бағытталған.
Осылайша, Шымкент қаласы әкімдігі мемлекеттік мүлікті тиімді басқару мен әлеуметтік маңызы бар азық-түлік тауарларының бағаларын тұрақтандыру бойынша кешенді шараларды жүйелі түрде жүзеге асыруды жалғастыруда, бұл өз кезегінде қала тұрғындарының тұрмыс сапасын жақсартуға және әлеуметтік тұрақтылықты нығайтуға ықпал етеді.
