Бүгін Шымкент қаласындағы Достық үйінде Қазақстан халқы Ассамблеясының бастамасымен және «Жомарт жан» жобасы аясында дәстүрлі «Мектепке жол» республикалық акциясының қалалық кезеңі басталды.
Игі шараның мақсаты – аз қамтылған және көпбалалы отбасылардан шыққан оқушыларға жаңа оқу жылы қарсаңында материалдық қолдау көрсету, олардың білім алуға деген құлшынысын арттырып, әлеуметтік теңсіздікті болдырмау.
100 балаға 1,5 млн теңгенің оқу құралдары табысталды
Акция аясында қалалық ҚХА мен Ақсақалдар кеңесінің мүшесі, кәсіпкер Арипджан Халназаровтың демеушілігімен әлеуметтік осал санатқа жататын 100 оқушыға жалпы сомасы 1,5 млн теңгеге жуық оқу құралдары мен керек-жарақтар (сөмке, дәптер, қалам, пенал, сурет салу жабдықтары және т.б.) салтанатты түрде табысталды.
Шараға қалалық ҚХА мүшелері қатысты
Шараға Шымкент қалалық ҚХА төрағасының орынбасары Тахирбек Нишанбаев, Ақсақалдар кеңесінің мүшесі Арипджан Халназаров, «Қоғамдық келісім» мекемесінің басшысы Нұркен Әлімқұлов және этномәдени бірлестіктердің өкілдері қатысып, балаларға жылы лебіздерін білдіріп, оқуда озат болуға тілектестік танытты.
– Бұл акция тек материалдық көмек қана емес, бұл – бала көңіліне үміт сыйлау, оқу жылын қуанышпен бастауына жағдай жасау. Жыл сайын ҚХА мүшелері осы дәстүрлі қайырымдылық шараға белсене қатысып келеді. Бұл – бірлік пен ізгілікке негізделген қоғамның көрінісі, – деді ҚХА төрағасының орынбасары Т.Нишанбаев.
Аналар кеңесі мен этномәдени бірлестіктер де белсенді атсалысты
Қалалық ҚХА жанындағы Аналар кеңесі бастауыш сыныпқа баратын 32 бүлдіршінді толық оқу құралдарымен қамтамасыз етуді өз мойнына алды. Сонымен қатар, этномәдени бірлестіктердің мүшелері мен еріктілері қаладағы 13 нүктеде қайырымдылық акцияларын өткізіп, жалпы сомасы 6 млн теңгеге жуық заттай көмек көрсетті.
Бұл көмектер әлеуметтік тұрғыда аз қамтылған, көп балалы және тұрмысы төмен отбасылардың балаларына таратылды.
Жалпы 7,9 млн теңгенің көмегі көрсетілді
Акция нәтижесінде Шымкент қаласында барлығы 532 оқушыға көмек көрсетіліп, оларға жалпы сомасы 7,9 миллион теңгеге оқу құралдары мен мектепке қажетті заттар табысталды.
«Мектепке жол» акциясы жыл сайын мыңдаған баланың жаңа оқу жылын сеніммен және шаттықпен бастауына мүмкіндік береді. Бұл — қоғамның әлеуметтік жауапкершілігінің, түрлі ұлт пен ұрпақтың өзара қолдауының айқын көрінісі.
Қалалық Қазақстан халқы Ассамблеясы бұл бағыттағы жұмыстарды алдағы уақытта да жалғастырып, қайырымдылық дәстүрін дамытуды көздеп отыр.
