Бүгін – қазақ бейнелеу өнеріндегі ірі тұлғаның туған күні. Ол – графика саласына әлемдік деңгейде жаңалық әкелген, өнерге өзгеше өрнек қосқан алып суретші, қылқалам шебері Батухан Баймен. Шығармаларын көрген көрші ел суретшілерінің бірі таңырқаса, енді бірі қызғанышын жасыра алмайды. Өйткені оның қолтаңбасы – қайталанбас, шеберлігі – шексіз.
Жетпіс жасқа толып отырған Баймен аға көлемі 2 х 6 метрге дейінгі графикалық туындыларды дүниеге әкелді. Бұл – кез келген суретшіге оңай шағылар шың емес. Бірақ ол жәй көлем үшін емес, мазмұн үшін еңбек етті. Туындыларының әр парағы терең ойға жетелейді: болашақ ұрпаққа бүгінгі тарихты хаттап, символдармен сөйлетті. Суретшінің қолынан шыққан әрбір бейне – уақыттың үні, қоғамның айнасы.
Алайда, өкінішке қарай, біз өзіміздің өнерпаздарымызға көбіне сырт көздің бағасы арқылы ғана назар аударамыз. Шетелде мойындалған соң барып «біздің азамат еді ғой» деп мақтанамыз. Ал шын мәнінде өнер иесіне ең бірінші болып құрмет көрсету – өз халқының, өз елінің міндеті емес пе?!
Бүгінгі мерейтой тек бір суретшінің ғана емес, тұтас ұлт мәдениетінің мерекесі болуы тиіс. Түркістан облысы мен Шымкент қаласының әкімдігі, Суретшілер одағы және мәдениет мекемелері осындай сәтте үнсіз қалмауы керек. Өнерді қолдау – идеологияны қолдау. Өйткені мәдениет – ұлттың рухани діңгегі, ал өнерпазға көрсетілген құрмет – сол ұлттың өзіне көрсетілген құрмет.
Егер осындай айтулы дата ескерусіз қалса, ол – біздің идеологиядағы әлсіздігіміздің, мәдени саясаттағы олқылығымыздың айғағы болмақ. Батухан Баймен ағамыз – халықтың жүрегін оятатын күшке ие тұлға. Суретшісін бағалай алмаған қоғам өз болашағын да бағалай алмайды.
Өнерді бағалау – ұлтты бағалау.
Өнертанушы Асқар Сатпаев
