Шымкент қаласында тұрғындарды табиғи газбен қамтамасыз етуге бағытталған инфрақұрылымдық жобалар кезең-кезеңімен іске асырылып келеді. Соның нақты дәлелі – Жұлдыз және Жалын тұрғын алаптарында жүзеге асқан табиғи газ желісінің құрылысы. Бүгін аталған екі шағынауданда 834 және 566 абонент алғаш рет көгілдір отынға қол жеткізді.
Ауқымды жобаның іске қосылуына орай өткен салтанатты шараға Шымкент қаласының әкімі Ғабит Сыздықбеков арнайы қатысып, тұрғындардың қуанышымен бөлісті.
Тұрғындардың өтініші – нақты іске
Газдандыру жұмыстары тұрғындардың тікелей өтініші бойынша қолға алынған. 2024 жылдың тамыз айында қала әкімі Ғабит Сыздықбековтің Жұлдыз және Жалын шағынаудандарының халқымен өткізген көшпелі кездесулерінде табиғи газ мәселесі өткір көтерілген болатын. Тұрғындардың ұсыныс-тілегін назарға алған қала басшылығы сол жылдың өзінде жобалық-сметалық құжаттаманы әзірлеп, құрылыс жұмыстарын бастап кетті.
Нәтижесінде бір жыл ішінде аталған екі тұрғын алапта жалпы 33 шақырымнан астам газ құбыры тартылып, мыңнан аса абонентке көгілдір отынға қосылуға мүмкіндік жасалды.
Ғабит Сыздықбеков: «Бұл – билік пен халық арасындағы сенімнің көрінісі»
Шара барысында сөз алған қала әкімі мердігерлер мен жауапты басқармаға алғысын білдіріп, тұрғындарға игілікті іске ортақ болудың маңызын атап өтті.
— Бұл тек инженерлік инфрақұрылымды дамыту емес, бұл — тұрғындардың өмір сапасын арттыруға бағытталған нақты қадам. Газбен қамту – әр отбасының күнделікті тіршілігіне тікелей әсер ететін маңызды фактор. Бүгінгі атқарылған жұмыс – тұрғындардың өтінішіне дер кезінде жауап берудің, билік пен халық арасындағы сенімнің нақты көрінісі. Шымкенттің әрбір аумағы кезең-кезеңімен толық инфрақұрылыммен қамтылады, — деді Ғабит Сыздықбеков.
Сондай-ақ әкім халықты ресми арналар арқылы техникалық шарттарды алу тәртібімен танысуға шақырды.
Газға қосылу – электрондық форматта
Тұрғындар газға қосылу үшін ең алдымен техникалық шарттарды алу жөнінде өтініш тапсыруы қажет. Бұл үдеріс толықтай электрондық форматта жүзеге асады. Өтініш беру үшін:
«eGov Mobile» мобильді қосымшасын пайдалану,
немесе
электрондық үкімет порталы – www.egov.kz сайтына кіру жеткілікті.
Газға қосылу бойынша қажетті құжаттар тізімі мен техникалық нұсқаулықтар порталдарда ашық жарияланған.
Жүйелі жұмыс жалғасады
Шымкент қаласында қазіргі таңда инженерлік инфрақұрылымды жаңғырту және кеңейту – әкімдік жұмысының басым бағыттарының бірі. Әсіресе жаңа құрылыс аумақтарын газ, су, жарық, кәріз жүйелерімен қамту бойынша жоспарлы жұмыстар жүріп жатыр.
2025 жылға қарай Шымкент қаласының барлық тұрғын алаптары кезең-кезеңімен орталықтандырылған газ жүйесіне қосылуы тиіс. Бұл мақсатта жергілікті және республикалық бюджеттен тиісті қаражат бөлініп, жобалар тұрақты бақылауда.
Қорытындылай келе, Жұлдыз және Жалын шағынаудандарын газдандыру – тек тұрғын үй инфрақұрылымын дамыту емес, бұл – әлеуметтік әділдік, халыққа қызмет етудің жарқын мысалы.
Қала әкімдігі алдағы уақытта да халықпен кері байланысты күшейтіп, әрбір ұсынысты ескеріп, тұрғындардың өмір сапасын арттыру бағытында жұмыстарды жалғастыра бермек.
