Шымкент қаласында дәстүрлі «Мерейлі отбасы – 2025» ұлттық байқауының қалалық кезеңі өз мәресіне жетті. Байқау жеңімпаздары мен жүлдегерлерін марапаттау рәсімі қаладағы Жастар ресурстық орталығында өтті. Салтанатты шараға қала әкімінің орынбасары Сәрсен Құранбек, сондай-ақ мемлекеттік органдар мен қоғам белсенділері қатысты.
Іс-шараның негізгі мақсаты — отбасылық құндылықтарды дәріптеу, үлгілі отбасылардың қоғамдағы маңызын арттыру және жастар арасында отансүйгіштік пен еңбекқорлыққа тәрбиелеу.
«Отбасы – қоғамның өзегі»
Салтанатты марапаттау рәсімінде сөз сөйлеген қала әкімінің орынбасары Сәрсен Абайұлы ұлттық байқаудың ел ішіндегі татулық пен бірлікті сақтау жолындағы маңызын атап өтті.
– Қазақ қоғамында отбасы – тәрбие мен мәдениеттің, ұрпақтар сабақтастығының қайнар көзі. Ер азаматтың орны, ананың мейірімі, қыз-келіннің тәрбиесі – ғасырлар бойы қалыптасқан асыл құндылықтар. Бұл жүйені сақтап қалу – бүгінгі буынның қасиетті борышы, – деді ол.
Сонымен қатар, қала әкімінің орынбасары алдағы уақытта байқаудың бұрынғы жеңімпаздары жайлы арнайы кітап жарық көретінін мәлімдеді.
150-ден астам отбасы қатысуға ниет білдірді
Шымкент қаласы Ішкі саясат және жастар істері жөніндегі басқармасының бөлім басшысы Ақбота Бекхожақызы биылғы байқаудың ерекшеліктеріне тоқталды.
– Қатысушылардың өтініштері 15 мамыр мен 15 маусым аралығында қабылданды. 150-ден астам отбасы ниет білдіріп, олардың ішінен 20 отбасы қалалық кезеңге жолдама алды. Бұл отбасылар балаларының жетістіктері, қоғамға қосқан үлесі, еңбек дәстүрін сақтауы және ұрпақтар сабақтастығы негізінде бағаланды, – деді ол.
Биылғы байқауда еңбек династияларына ерекше көңіл бөлінді, бұл – ұрпақтан-ұрпаққа жалғасып келе жатқан кәсіби дәстүрлердің қоғамдағы маңызын арттыруға бағытталған.
Бас жүлде – Нұртаевтар әулетіне
Байқау қорытындысы бойынша 20 отбасының барлығына Шымкент қаласы әкімінің Алғыс хаттары мен теледидарлар табысталды.
Ал бас жүлдені – Әл-Фараби ауданынан қатысқан Нұртаевтар әулеті жеңіп алды. Теміржол саласында бірнеше ұрпақ бойы еңбек етіп келе жатқан бұл отбасы 1 миллион теңге көлеміндегі сертификатпен марапатталып, Астана қаласында 12 қыркүйекте өтетін республикалық кезеңге жолдама алды.
Ұлттық байқау жалғасады
«Мерейлі отбасы» ұлттық байқауы — ел Президентінің бастамасымен қолға алынған, бүкілхалықтық қолдауға ие болған жоба. Ол жыл сайын еліміздің түкпір-түкпірінен шыққан үлгілі отбасыларды насихаттауға, ұлттық құндылықтарды дәріптеуге және отбасылық институтты нығайтуға бағытталған.
