Биыл Түркістан облысында «Өңірлік жұмыс орындарын құру картасы» аясында 130 769 жұмыс орындарын ашу жоспарланған. Оның ішінде, 83 554-і тұрақты, 47 215 уақытша жұмыс орны. Өңір басшысы Нұралхан Көшеровтің тапсырмасымен бұл саладағы жұмыстар қатаң бақылауға алынған.
Аталмыш мәселеге байланысты Жетісай ауданының әкімі Серік Үсенұлы Мамытов Түркістан облысы Еңбек мобильділігі орталығынның директоры Абзал Казанкаповты қабылдап, ауданда ашылып жатқан жаңа жұмыс орындары арқылы тұрғындар арасында жұмыссыздық деңгейін төмендету, инвестициялық жобаларды жүзеге асыру арқылы кедейшілік шегін түсіру, әлеуметтік қорғау саласындағы индикаторлардың орындалуын бақылау, мүгедектігі бар адамдар мен пробация қызметі есебінде тұратын азаматтарды жұмыспен қамтуды үйлестіру мәселелері бойынша пікір алмасты.
Кездесу барысында Абзал Дәулетәліұлы халықты жұмыспен қамту саласындағы 4 айында облыс аумағында жұмыссыз азаматтарды тұрақты жұмыспен қамту бойынша 7883 жұмыс орнын ашу жоспарланып, 12031 жұмыс орны құрылғанын, нәтижесінде, 1 айда 4148 азамат тұрақты жұмысқа орналастырылғанын, «10 мың тұрғынға 100 жаңа жұмыс орны» жобасы аясында 1747 жұмыс орны, 1 айдың ішінде 775 жаңа жұмыс орны ашылғанын, ұлттық жобалар аясында 321 азамат жұмыспен қамтылғанын жеткізді.
Сонымен қатар, жүздесуде өз кәсібін бастаймын, адал еңбек етемін деушілерге берілетін мемлекеттік қайтарымсыз гранттардың бірінші легі бойынша Жетісай ауданына берілген 75 орынға 150 азаматтың құжат тапсырғаны, бизнес жобаларды қаржыландыруда қатаң бақылау жүргізілетіні және мемлекет қаржысының әр тиынының есебі сұралатыны да нақты айтылды.
Жүздесу соңында Серік Үсенұлы Еңбек мобильділігі орталығына бекітілген бағдарламалар мен жоспарлардың жүзеге асуына әкімдік тарапынан барынша қолдау көрсетілетінін айтты.
