Бүгін «AMANAT» партиясы жанындағы «Жастар Рухы» Жастар қанатының ұйымдастыруымен Қарағанды облысындағы «Спасск» оқу-жаттығу орталығында «Qaisar» әскери-патриоттық ойындарының алғашқы күні өтті. Шара Ұлы Жеңістің 80 жылдығына орай ұйымдастырылып отыр және оған Қазақстан Республикасы Қорғаныс министрлігінің «36352 әскери бөлімі» РММ қолдау көрсетті.
«Qaisar» әскери-патриоттық ойындары алдағы күндері де жалғасады. Шараға еліміздің 20 аймағынан 100 жас қатысуда.
«AMANAT» партиясының төрағасы, ҚР Парламент Мәжілісінің төрағасы Ерлан Жақанұлы қатысып, жастарға ойындарға сәттілік тіледі.
«Отанды қорғау – әр азаматтың қасиетті борышы, перзенттік парызы. «Qaisar» жобасының қатысушылары – жас, жігерлі, білімді және отаншыл азаматтар болашақта еліміздің сенімді тірегіне айналады деген ойдамын» — деді.
Ойынның басты мақсаты — жастар арасында Отанға деген сүйіспеншілік пен азаматтық жауапкершілікті қалыптастыру, әскери-қолданбалы дағдыларды меңгерту, сондай-ақ салауатты өмір салтын насихаттау.
Қатысушылар келесі бағыттар бойынша бақтарын сынайды:
• «Рухты Сарбаз» — ұлттық ойындар: садақ ату мен арқан тарту сайысы;
• Әскерилендірілген кросс — физикалық дайындық пен төзімділікті сынайтын сайыс;
• Калашников автоматын бөлшектеу және құрастыру — уақыт пен дәлдікке негізделген әскери машық;
• Әскери-интеллектуалдық «QUIZ» — әскери тарих, тактика және заманауи қарулы күштерге қатысты сұрақтарға жауап беру.
Іс-шара жас сарбаздардың рухын көтеріп, патриоттық сезімін нығайта отырып, еліміздің қорғаныс қабілетін арттыруға үлес қосуды көздейді.
#AMANAT
