ҚР Президенті Қ.Тоқаевтың тапсырмасына сәйкес, Түркістан облысында тұрғындардың тұрмыс жағдайын жақсарту басты назарда. Осыған орай, облыстың барлық аудандарында көптеген жаңа нысандар салынып жатыр. Осы ретте, аудан әкімі Арман Сабитов құрылыс нысандарына арнайы барып, жұмыс барысымен танысты. Алдымен Ақсукент ауылдық округіндегі «Жайлы мектеп» ұлттық жобасы аясында құрылысы жүріп жатқан білім беру нысанына барды. «Samruk-Kazyna Construction» АҚ тапсырысымен салынып жатқан заманауи мектеп 600 орынға лайықталған. Аталған мектепте кең әрі жарық сынып бөлмелері, жаңа технологиямен жабдықталған пән кабинеттері, спорт және акт залы, ІТ сынып, кітапхана, медициналық кабинет және асхана мен қауіпсіздік жүйелері толық қарастырылмақ.
Сонымен қатар, аудан әкімі аудандағы жалдамалы тұрғын үйлердің құрылыс барысымен танысты. Арман Сабитов жұмыс қарқынын бақылап, құрылыс сапасы мен мерзімін қатаң бақылауға алуды тапсырды. Бұдан бөлек, Қарасу ауылында бой көтеріп жатқан денешынықтыру-сауықтыру кешенінде болды. Аталған нысан «Ауыл – ел бесігі» мемлекеттік бағдарламасы аясында салынып жатыр. Нысан іске қосылғаннан кейін Қарасу, Ақбай, Жаңатұрмыс, Бескепе және Қызылсу ауылдарынан 800-ге жуық жас — бокс, күрес, волейбол, баскетбол, үстел теннисі секілді спорт түрлерімен шұғылдана алады. Сонымен қатар, кешенде облыстық және республикалық деңгейдегі жарыстарды ұйымдастыруға болады.
Түркістан облысының Өңірлік коммуникациялар қызметі
