Менингококкты инфекция –ауа- тамшылы жолмен тарайтын, назофарингит және генерализденген (жайылған) түрлерінде өтетін, клиникасы қызбамен, мұрын-жұтқыншақтың шырышты қабықтары мен жұмсақ ми қабықшасының зақымдануымен сипатталатын жедел жұқпалы ауру.
Инфекция көзі- ауру адам, бактерия тасымалдаушы. Көп жағдайда бактерия тасымалдаушы жоғары эпидмиологиялық маңызға ие.
Менингококк инфекциясының қоздырғышы сыртқы ортаға төзімсіз, күн сәулесі, дезинфекциялық заттар әсер еткенде тез жойылатын микробтар. Менингококк инфекциясының жиілігі маусымдылықпен сипатталады-ең жоғары жиілік қыста және ерте көктемде болады. Ауру кез-келген жастағы адамдарды зақымдайды, көбіне балалар ауырады. Менингококкты инфекция имунитеті төмен адамдардың ағзасында тез дамиды.
Инкубациялық (жасырын) кезеңі 2-10 күн уақыт аралығын қамтиды.
Менингококк инфекциясына тән үштік- бұл бас ауру, құсу және дене температурасының көтерілуі.
Инфекция жұқтырған адамда дене қызуының 38-40°С дейін көтерілуі, қалтырау, бастың қатты ауырсынуы, құсу сынды белгілер болады. Бір жасқа дейінгі баланың еңбегі көтеріледі (томпайып кетеді), мойынның шалқаюы, баланың өңі кірмейді, сұлық жата береді, басы мен мойынын артқа шалқайтып ұстайды. Науқастарда өте тез мазасыздану, қимылдық қозу, терінің гиперестезиясы дамиды, сананың ессіз күйден комаға дейін бұзылуы қосылады, менингеалды симптомдар өршиді.
Ауру симптомсыз бактерия тасымалдаушылықпен және жіті менингококк назофарингиті түрінде, әлсіз көрінетін интоксикация және ринофарингит белгілерімен өтуі де мүмкін, клиникалық белгілері бойынша ЖРВИ-ға ұқсайды.
Менингококк инфекциясымен ауыратын науқастарды емдеуге жатқызу клиникалық және эпидемиологиялық көрсетімдері бойынша жүргізіледі. Менингококк инфекциясының генерализацияланған түрі мен назофарингиттің өршуі кезінде науқастар стационарлық емдеуге жатқызылуы тиіс.
Менингиттің алдын алу үшін ұсынылады:
1) Витаминдер мен микроэлементтермен байытылған толық және теңдестірілген тамақтану, спортпен шұғылдану, ағзаны шынықтыру;
2) Бөлмеге ылғалды жинау жұмыстарын жүргізіп, жиі желдету;
3) Жеке бас гигиенасын сақтау, дәретханаға барғаннан және тамақ ішердің алдында қолды мұхият сабындап жуу;
4) Халық көп жиналатын жерлерге, сауда-ойын-сауық кешендеріне, нашар желдетілетін үй-жайларда өткізілетін мәдени-көпшілік іс-шараларға баруды шектеу. Көпшілік орталарға түскен кезде бір реттік бетперделерді қолдану;
5) Инфекцияға тән симптомдар біліне бастағаннан дәрігерлік көмекке қаралу;
Есіңізде болсын! Қандай ауру болмасын, дер кезінде медициналық көмекке жүгінген кезде, Сіз өз өміріңізді және отбасыңызды аман алып қаласыз!
Нышанов Нұрбек Садықбекұлы
ҚР ДСМ СЭБК Түркістан облысының санитариялық-эпидемиологиялық бақылау департаменті басшысы
