Түркияның Бурса қаласындағы «Улудаг» университеті микробиология кафедрасының қызметкерлері коронавирус инфекциясын бір минуттың ішінде жоятын мұрынға арналған спрей жасап шығарған. Бұл туралы Daily Sabah газеті мәлімдеді.
Мерзімді басылымдағы ақпаратқа сәйкес, аталған спрейді Шехиме Гюльсюн Темель профессоры мен Ахмет Юмит Сабанджи және Гюнейт Озакин есімді дәрігерлер ойлап тапқан.
Дәрігер Юмит Сабанджидің сөзінше, олар зерттеу жұмыстарын коронавирус пандемиясынан бұрын бастаған.
«Біз аталған препараттың бактерияға қарсы белсенділігі бар екенін дәлелдедік. Сондай-ақ пандемия басталғаннан кейін COVID-19 -ға қарсы күреске үлес қосамыз деп ойладық. Зерттеуімізге сәйкес, бұл спрей ауыз және мұрындағы вирусты жоятындығы дәлелденді. Бұдан өзге вирустың таралуына тосқауыл болады”, — деп түсіндірді дәрігер Сабанджи.
Ал профессор Темель спрейдің шырышты қабаттардағы эпителий жасушаларына мүлдем зиянсыз екенін алға тартады.
«Оның үстіне, біз оның осы жасушаларға емдік әсері бар екенін де көрсеттік. Сондықтан бұл препарат қауіпсіз. Қорықпай пайдалануға болады», — деді ол.
Ғалымдардың айтуынша, бұл препаратты нанотехнология арқылы жетілдірген соң, вирусқа қарсы әсері тұрақталып, белгілі бір молекулаларға ұзақ мерзімге дейін әсер етеді. Сонымен қатар өздері ойлап тапқан спрейді тек COVID-19 инфекциясына ғана емес, өзгеде түрлі бактерияларға қарсы тиімділігі жоғары екендігін хабарлап отыр.
