Төрткүл дүниенің назарын аударған көшпелілер ойындарының ертең салтанатты ашылу рәсімі өтеді. Апта бойы елорда төрінде этноспорт додасы қызып, мәдени, ғылыми бағыттағы іс-шаралар елдігімізді әйгілей түсетіні сөзсіз. Он жылдан бері жүлгесі үзілмей келе жатқан Дүниежүзілік көшпелілер ойындарында алты құрлыққа сауын айтылды. Әлемнің таңдаулы ақпарат құралдары Арқа төсінен тікелей хабар таратады.
Мемлекет басшысы Қасым-Жомарт Тоқаев дүбірлі додаға дайындықты пысықтаған кеңесте байрақты бәсеке жоғары деңгейде ұйымдастырылып, халқымыздың терең тарихы мен мәдениетін, қонақжайлық қасиетін көрсетуге тиіс екенін, меймандар мен спортшыларға қажетті жағдай жасау аса маңызды екенін ескертті. Сайыстарды қабылдайтын инфрақұрылым жаңғыртылып, спорт кешендеріне күрделі жөндеу қарқынды жүргізілді. Ұлттық ойындарды қабылдайтын кешендер маңынан жаңа нысандар да соғылып, сайыстар ғана емес, мәдени іс-шаралар өтетін этноауыл бой көтерді.
Елімізде бұған дейін қысқы Азия ойындары, студенттер арасында бүкіләлемдік қысқы Универсиада сынды дүбірлі додалар жоғары деңгейде ұйымдастырылды. Енді міне, этноспорт аламанының түңлігі түрілетін де сәт жақын.
Қашанда «тойдың болғанынан боладысы қызық». Жұмылған жұдырықтай ынтымақпен өрбіген әзірлік жұмыстары да тиянақталды. Ұйымдастыру алқасы барлық шараны жүйелі жүргізілгенін айтты. Көшпелілер ойындарында сайысқа қосылатын аттар мен құсбегілік додасында қырағылығы сыналатын құстарды ұстайтын орын қажетті ветеринарлық-санитарлық стандартқа сай келеді. Президент жанындағы Орталық коммуникациялар қызметінде өткен брифингте V Дүниежүзілік көшпелілер ойындарын дайындау және өткізу жөніндегі дирекция басшысының орынбасары Абылай Қондыбаев пен «Ұлттық және ат спорты түрлері орталығы» РМҚК директоры Бақдәулет Сәбитов ұйымдастыру алқасы да, қатысушылар да сақадай-сай әзір екенін жеткізді
А.Қондыбаев дүбірлі аламанға жалпы саны 560 ат әкелінгенін атап өтті. Оның ішінде 114 жүйрікті ат спорты ойындарына қатысатын ұлттық құрама мүшелері мініп шықса, 300-ге жуық қылқұйрық көшпелілер ойындарына қатысатын шетелдік командаларға уақытша беріледі. Қырғызстан, Моңғолия, Қытай сынды елдерден келетін делегация өз аттарын мініп шығады. Этноспорт аламанына қатысатын аттардың барлығы да «Арғымақ» ат спорты кешенінде және «Қазанат» ипподромында арнайы соғылған қорада тұрады.
Ал дәстүрлі аңшылық өнер сайысында («Құсбегілік») көрермендер 45 қыранның өнерін тамашалайды. Бұл ұлттық құраманың құстары, сондай-ақ Моңғолия мен Қырғызстаннан қырандар, сұңқарлар мен қаршығаларын құсбегілер өздері әкелмек. Бір аптаға ұласатын айтулы іс-шарада 1 300 ерікті жұмылдырылады. Абылай Қондыбаев еріктілер бірнеше бағыт бойынша қызмет атқаратынын айтты.
