Біз тұрмыстық химия өнімдерімен күнделікті бетпе-бет келеміз. Себебі, бұл өнімдер тазалау жұмыстарын жеңілдетіп қана қоймай, тезірек, әрі тиімдірек етеді. Алайда, пайдасымен қатар мұндай өнімдер денсаулыққа зиян тигізуі мүмкін, әсіресе егер сізде аллергия немесе тері ауруларына бейімділік бар болса.
Қауіпсіз құрамы бар тұрмыстық химия өнімдерін қалай таңдауға болады?
Тұрмыстық химия тауарлары Кеден одағы Комиссиясының 2010 жылғы 28 мамырдағы №299 шешімімен бекітілген «Санитариялық-эпидемиологиялық қадағалауға (бақылауға) жататын өнімге (тауарларға) қойылатын бірыңғай санитариялық-эпидемиологиялық және гигиеналық талаптарда» белгіленген талаптарға сәйкес келуге тиіс.
Құралды дұрыс таңдау үшін тұрмыстық химия өнімдерінің тұтынушылық таңбалауын зерттеңіз. Өнімнің өндірушісі туралы мәліметтерді, өндіріс мекен-жайын, өнімнің құрамы туралы мәліметтерді, өнімді тиімді және қауіпсіз пайдалану ережелері мен шарттарын, шығарылған күні мен жарамдылық мерзімін, сақтау шарттарын, сақтық шараларын қоса алғанда, өнімнің атауы мен белгіленуіне назар аударыңыз.
Концентрацияланған өнімді тым көп пайдалануға кеңес бермейміз. Өндірушінің ескертулеріне назар аударып, дозалау және жиілік нұсқауларын орындаңыз. Кейбір құралдарды тек жақсы желдетілетін жерде қолдануға болады, сондықтан, жеке қорғаныс құралдарын қолдануды ұмытпаңыз.
Ешқашан тұрмыстық химияны балаларға қол жетімді жерде қараусыз қалдырмаңыз.
Тұрмыстық химия өнімдерін тамақ өнімдеріне жақын жерде қолданбаңыз немесе сақтамаңыз, тамақ өнімдеріне, содан кейін адам ағзасына еніп, қатты улануды тудыруы мүмкін. Өнімдерді ашық күйде сақтамаңыз, ашық ауада кез-келген зат булана бастайды: өнімнің негізгі компоненттері буланып, оның тиімділігін төмендетеді. Буланған заттар ұзақ уақыт бойы ауаның құрамында қалады, содан кейін тыныс алу кезінде адам ағзасына оңай енуі мүмкін.
Тұрмыстық химия тауарлары Кеден одағының кедендік аумағына айналысқа шығар алдында синтетикалық жуғыш заттар мен тұрмыстық химия тауарларының жекелеген түрлерін мемлекеттік тіркеу нысанында сәйкестікті растауды бағалаудан өтеді.
Өнімді мемлекеттік тіркеу туралы куәлікті нөмірі бойынша «Мемлекеттік тіркеу туралы куәліктердің бірыңғай тізілімі» сайтында тексеруге болады.
Нышанов Нұрбек Садықбекұлы
ҚР ДСМ СЭБК Түркістан облысының санитариялық-эпидемиологиялық бақылау департаменті басшысы
