Қазақстан Премьер-Министрінің орынбасары – ұлттық экономика министрі Нұрлан Байбазаров Экономикалық ынтымақтастық және даму ұйымы (ЭЫДҰ) Еуразия бөлімінің басшысы Уильям Томпсонмен кездесті.
Тараптар ұйымның ұсынымдарын имплементациялау барысын, ҚР Үкіметі мен ЭЫДҰ Хатшылығының 2025 жылға дейінгі бірлескен іс-қимыл жоспарын іске асыру, сондай-ақ ЭЫДҰ-ның Еуразиялық бәсекеге қабілеттілік бағдарламасы аясындағы ынтымақтастық мәселелерін талқылады
Кездесуде Қазақстанда ЭЫДҰ өкілдігін ашу бастамасы айтылды. Бүгінде ұйымның аймақтық кеңселері Қытайда, Индонезияда, Украинада және Грекияда жұмыс істейді.
Уильям Томпсон ЭЫДҰ-ның Қазақстанмен өзара іс-қимылдың оң тәжірибесін атап өтті. Ұсынымдарға сәйкес елімізде бірқатар саяси және экономикалық өзгерістер жүргізілді: инвестициялық омбудсмен институты енгізілді, бюджет қаражатының жұмсалуына парламенттік бақылау күшейтілді, елдің 2060 жылға дейінгі төмен көміртекті даму стратегиясы әзірленді, жауапты бизнес жүргізу жөніндегі ұлттық байланыс және Жоғары аудиторлық палата құрылды. Билікті орталықсыздандыру процесі басталды – аудандар мен облыстық маңызы бар қалалардың әкімдерін тікелей сайлау енгізілді.
«Еліміз ЭЫДҰ-ның 15 жылдан астам тұрақты серіктесі әрі Орталық Азияда оның ұсынымдарын имплементациялау бойынша көшбасшы. 2025 жылы Қазақстан осы беделді халықаралық ұйымға толыққанды мүше ретінде кіру үшін өтінім беруге ниетті. ЭЫДҰ-мен әрі қарайғы ынтымақтастығымыз мемлекетіміздің әлеуметтік-экономикалық және құқықтық аспектілерінің дамуына оң әсер ететініне сенімдіміз», — деп атап өтті Нұрлан Байбазаров.
Бүгінгі күні Қазақстан Ұйымның 37 жұмыс органына қатысады, оның ішінде 18 комитетте және жұмыс органдарында – «шақырылған» мәртебесіне, 10 комитетте және жұмыс органдарында – «қатысушы» мәртебесіне, 2 комитетте «қауымдастырылған мүше» мәртебесіне және 7 құрылымда «серіктес» мәртебесіне ие. Сондай-ақ, ЭЫДҰ-ның 42 құқықтық құралына қосылды.
Құқықтық құралдарға қосылу және олардың ережелерін табысты іске асыру сараптамалық шолулар жүргізумен және ЭЫДҰ жұмыс органдарына белсенді қатысумен қатар комитеттерге қатысу мәртебесін арттыру үшін өлшемшарттардың бірі болып табылады.
Ынтымақтастықтың басым салаларын айқындайтын ЭЫДҰ-мен ынтымақтастықтың негізгі құжаттарының бірі 2018 жылы қол қойылған Қазақстан Үкіметі мен ЭЫДҰ арасындағы өзара түсіністік туралы Меморандум болып табылады.
