Шымкент қаласының туристік әлеуеті жыл сайын артып келе жатқан мегаполистер қатарында. Жыл басынан бері салада атқарылған жұмыс көп. E-QONAQ жүйесі бойынша 2024 жылы 1 қаңтар – 23 тамыз айлары аралығында жүйеге тіркелген шетелдік туристер саны 26 мыңнан асып жығылады. Ресми статистика негізінде, шет елден Шымкент қаласына келетін мемлекеттердің алғашқы ондығы да жасақталған:
- Өзбекстан- 11 004
- Ресей Федерациясы — 4308
- Қытай — 3240
- Түркия — 1653
- Қырғызстан — 931
- Тәжікстан — 603
- Үндістан- 502
- Украина — 314
- Германия — 294
- АҚШ — 287
Ал 2023 жылдың қорытындысымен жалпы қалаға келген туристер саны 449 098-ге жетті (ішкі туристер саны 420 398, шетелдік туристер саны 28 700 адам).
Ел Үкіметі Қазақстанды әлемдегі жетекші туристік бағыттардың біріне айналдыруды мақсат етіп отыр. Бұл мақсатқа жету үшін туристік инфрақұрылымды одан әрі дамыту, сондай-ақ тұтынушыларға қызмет көрсету сапасын арттыру жоспарлануда. Осы жұмыстардың аясында Қазақстанда жаңа қонақүйлер, мейрамханалар, ойын-сауық орталықтары және басқа да туристік қызмет көрсету нысандарын салу жоспарлануда. Заман талабына сай қонақ үйлердің артуы туризмнің дамуына айырықша серпін беретіні анық. Осы тұрғыда 2024 жылға 8 туристік инвестициялық жобаның құрылыс жұмыстары басталып, жыл соңына дейін іске қослуы жоспарлануда. Сондай-ақ, биыл темір жол вокзалының реконструкциялау жұмысы аяқталып қолданысқа берілсе, жаңа әуежай терминалы ағымдағы жылдың соңына дейін ашылады.
Ал Шымкент қаласында туристерді ең көп қызықтыратын нысандар «Ибрагим ата», «Қарашаш ана» кесенелері, «Арбат» жаяу жүргіншілер аймағы, «Shymqala» тарихи-мәдени кешені, Бәйдібек би ескерткіші, Зообақ, Сейітжан Қари мешіті, Қошқар ата өзені. Бұдан бөлек, Қазақстандағы алғашқы Дендрологиялық саябақтың да туристер үшін алар орны ерекше. Мемлекет басшысы Қ.Тоқаев: «Бүгінде әлемдік жалпы өнімдегі туризмнің үлесі 9 пайыздан асты. Яғни, пандемияға дейінгі деңгейге қайта келді деуге болады. Дүниежүзіндегі жұмыс орындарының шамамен 10 пайызы туризмге тиесілі. Әрбір төртінші жұмыс орны осы салада ашылып жатыр. Көрсетілетін қызметтер бойынша әлемдік экспорттың 30 пайызы, инвестицияның 7 пайызы және салық түсімдерінің 5 пайызы туризм арқылы түседі. Қазақстанда туризмнің барлық түрін дамытуға мол мүмкіндік бар, экологиялық туризмнен бастап бизнес туризміне дейін дамытуға болады, – деп тілге тиек еткен болатын.
Президент тапсырмасын жүзеге асыру мақсатында биыл сәуір айының 22-24 күндері аралығында «Гид-экскурсоводтарға, қонақ үй қызметкерлеріне және рестораторларға арналған семинар-тренингтер ұйымдастырылды. Жалпы семинарға бизнестің 90 қызметкері қатысты. Үш күндік оқуды аяқтағаннан кейін қатысушылар өздерінің білімдері мен дағдыларын көрсете отырып, емтихан тапсырды. Барлық 90 азамат емтиханды сәтті тапсырып, олардың кәсібилігі мен туристерге сапалы қызмет көрсетуге дайындығын растайтын лайықты сертификаттар алды.
Шымкент қаласының туризм, сыртқы байланыстар және креативті индустрия басқармасының ұйымдастыруымен ағымдағы жылдың қаңтар-сәуір айларында Индонезия, Ресей, Франция, Германия, Италия, Оңтүстік Корея, Сингапур және т.б. елдерден келген блогерлерге 13 танымдық-ақпараттық экскурсия өткізілді.
Түркістан әуежайында «Visit Shymkent» туристік ақпараттық орталығының дүңгіршегі ашылды
Жуырда тікелей ұшақпен киелі Түркістанға келетін туристерге Шымкент қаласының туристік объектілерін жарнамалау мақсатында Түркістан қаласының әуежайында «Visit Shymkent» туристік ақпараттық дүңгіршегі ашылды.
Аталған дүңгіршек таңғы 10:00-ден кешкі 19:00-ге дейін жұмыс жасап, қаламыздың мәдени, гастрономиялық, эко, экстремалды және т.б. бағыттарының турмаршруттарын туристерге ұсынады.
Сонымен қатар, Шымкент қаласының киелі орны Сайрам тұрғын алабындағы Қожа Ахмет Ясауидің ата анасы Ибрагим ата мен Қарашаш анаға және басқа да әулиелерге зиярат жасауға шақырып, Шырайлы Шымқаламызға жетудің ыңғайлы жолдарын айтып, көмектеседі. Өзбекстан Республикасының Бас консулдығы «Visit Shymkent» туристік ақпараттық орталығымен бірлесе, ағымдағы жылдың 8 маусым күні Өзбекстанның туристік әлеуетін таныстыру бойынша Шымкент қаласының 30-дан астам ірі туристік бизнес өкілдерімен кездесу ұйымдастырды. Туристерді тартудың бірден-бір құралы – қаланы жарнамалау болып табылады. Осы орайда 29 маусым мен 1 шілде аралығында Қаланың туристік имиджін арттыру келушілердің санын көбейтудің мақсатында ақпараттық тур өткізілді. Тур аясында гастрономиялық дәстүрлі қазақ тағамдары, мұражайлар, креативті арт-кешендер мен саябақтар, өндірістік зауыттар таныстырылды Турға Түркия, Ресей, Әзірбайжан, Латвия, Мысыр, Өзбекстан, Қырғызстан және еліміздің бірқатар өңірінен келген 30 travel-блогер қатысты. Жалпы әлеуметтік желілерде Шымкент туралы 162 посттар салынып, 8 миллионнан аса қаралым жиналды.
Шілде айынан бастап аптаның әр бейсенбі күні шетелдік туристерге арнап қала бойынша тегін автобустық экскурсия өткізіледі, бүгінгі күнге дейін аталған тегін экскурсияға американдық, қытайлық, ресейлік, беларусиялық туристер қатысты.
Ал 20-21 шілде Самарқанд қаласында роуд-шоу ұйымдастырылды. Іс-шараға 40-қа жуық туристік ұйымдар мен агенттіктер, қонақ үй басшылары, БАҚ өкілдері және Самарқанд қаласының туризм департаментінің өкілдері қатысты. Іс-шара өорытындысы бойынша өзара ынтымақтастық жөнінде 6 меморандумға қол қойылды.
Бұдан өзге 19 тамыз күні «Visit Shymkent» туристік ақпараттық орталығы кедендік бақылау, әуежай және туристік полиция өкілдеріне арнап семинар-тренинг өткізді. Семинардың мақсаты шетелдік туристердің құқықтық жағдайлары, қазақ халқының қонақжайлық ерекшеліктері және туристердің психологиясы тақырыптарын терңінен қызметкерлерге түсіндіру болып табылды. Аталған іс-шараға 40 — қа жуық мамандар қатысты. Бұл бағыттағы жұмыстар легі тоқтамайтыны анық. Нәтижесінде Шымкент туризмнің орталығына айналады.
