Жазғы демалыс аяқталып, қоңырау соғылып, оқушылардың мектепке баруына аз уақыт қалды. Әрбір оқушының сапалы білім алуы, жан-жақты дамуы, қауіпсіздігі бірінші орында болуы тиіс. Түркістан облысы санитариялық-эпидемиологиялық бақылау департаменті өз құзыреті аясында білім беру объектілеріне қойылатын санитариялық-эпидемиологиялық талаптардың орындалуын қамтамасыз етеді.
Білім беру объектілерінің аумағы қоршалған, аумағында функционалдық қатысы жоқ объектілерді орналастыруға жол берілмеуі тиіс. Мектептке ауыз сумен, ыстық сумен, кәріз жүйесімен, жарықпен, желдетумен, жылытумен және медициналық бөлмелермен қамтамасыз етілуі, жиһаздар мен заттардың жабдықталуы балалардың өсу және жас ерекшеліктеріне сәйкес болуы керек. Барлық үй-жайлар таза болуы тиіс. Дезинфекциялық ерітінділерді пайдалану арқылы күнделікті тазалау жұмыстары жүргізіліп, жәндіктердің, кеміргіштердің болуына жол бермеу үшін дератизациялық және дезинсекциялық іс-шаралар жүргізілуі қажет.
Департаменттің қадағалауында 1022 білім беру мектептері, 919 мектеп асханалары бар. Оның ішінде 103 мектеп, 22 мектеп асханасы, 2 буфет санитариялық-эпидемиологиялық талаптарға сәйкестігі туралы қорытындысыз жұмыс жасауда. Бұл нысандарға тексеру жұмыстары барысында бұзушылықтарды жою туралы нұсқама шығарылады, сондай-ақ Қазақстан Республикасының заңдарында көзделген жағдайларда жедел ден қою шаралары қолданылады.
Мектеп асханаларында оқушылар қауіпсіз әрі сапалы тамақпен қамтамасыз етуі тиіс. Облыстық білім басқармасымен бекітілген перспективтік ас мәзірі жасалады. Тамақ өнімдері мен азық-түлік шикізатын қабылдау, олардың сапасы мен қауіпсіздігін куәландыратын құжаттары болған жағдайда жүзеге асырылады. Күнделікті медициналық қызметкер немесе жауапты маман дайындалған тағамның сапасына органолептикалық бағалау жүргізеді.
Есептегі кезеңде, яғни тамыз айының басынан Түркістан облысының санитариялық-эпидемиологиялық бақылау департаментінің аумақтық басқарма мамандары аудандық, қалалық білім бөлімі мамандарымен бірігіп мектептердің жаңа оқу жылына дайындығы бойынша мониторинг жүргізілуде. Бүгінгі күнге 408 мектептің жаңа оқу жылына дайындығы тексерілді.
Бұдан басқа, облыста үш ауысымды 5 мектептің (Сарыағаш-1, Созақ-1, Түркістан-3) орнына «Жайлы мектеп» ұлттық жобасы аясында жаңа мектеп ғимараттарының құрылысы жүргізілуде. Жоспарға сәйкес 2024 жылдың соңына дейін пайдалануға беріледі. Сонымен қатар, апатты деп танылғын 4 мектептің (Қазығұрт-1, Сарыағаш-1, Созақ-1, Жетісай-1). 3 –уі «Жайлы мектеп» ұлттық жобасы аясында, ал 1 мектеп облыстық бюджет есебінен салынуда.
Нышанов Нұрбек Садықбекұлы
ҚР ДСМ СЭБК Түркістан облысының санитариялық-эпидемиологиялық бақылау департаменті басшысы
