Қазақстан Кореяның Орталық Азия өңіріндегі ең ірі сауда және инвестиция серіктесіне айналды. Бұл туралы Корея Республикасының Президенті Юн Сок Ёль «Egemen Qazaqstan» газетіне берген сұхбатында айтты.
«Корея мен Қазақстан 1992 жылы дипломатиялық қатынас орнатқалы бері етене ынтымақтастық байланысты дамытып келеді. Дипломатиялық қатынас басталған сәттен бері екі ел арасындағы сауда көлемі 500 еседен астам ұлғайды. Нәтижесінде, Қазақстан Кореяның Орталық Азия өңіріндегі ең ірі сауда және инвестиция серіктесіне айналды», деді Корея Президенті.
Оның айтуынша, екі ел арасындағы ынтымақтастықтың серпінді кеңеюіне қос мемлекеттің бірін-бірі толықтырушы өнеркәсіптік құрылымға ие болуын, ал берік сенімді қарым-қатынастарға аралас циклді Қарабатан ЖЭС және Үлкен Алматы айналма автомобиль жолы (ҮАААЖ) сияқты ортақ табыстарды мысалға келтіруге болады.
«Екі ел арасындағы экономикалық ынтымақтастықты қолдаудың институционалдық базасы өткен жылы Сауда мен инвестицияларды ілгерілету туралы негіздемелік келісімге (TIPF) қол қою арқылы күшейтілді. Бұл сапар маңызды минералдар, өңдеу өнеркәсібі және инфрақұрылым сияқты салалардағы ынтымақтастықтың нақты нәтижелеріне қол жеткізуге мүмкіндік береді деп ойлаймын», деді Юн Сок Ёль.
Қазақстанға мемлекеттік сапары қарсаңында Корея Республикасының Президентінің «Egemen Qazaqstan» газетіне берген сұхбатының толық нұсқасын мына сілтеме арқылы оқи аласыз. Корея билігінің хабарлауынша, Президент Юн Сок Ёль 10-15 маусым күндері біздің елге ғана емес, сонымен қатар Өзбекстан мен Түрікменстанға да мемлекеттік сапармен барғалы отыр. Ёль мырзаның алдағы сапары туралы ресми хабарламада Орталық Азия ежелгі Жібек жолының негізгі бөлігі болғаны, бұл өңір Еуропа мен Азияны байланыстыратын стратегиялық орын екені айтылған. Сондай-ақ Украина мен Таяу Шығыс төңірегіндегі геосаяси ахуал сынды соңғы саяси да әскери дағдарыстардың әсерінен Орталық Азияның өңірлік маңызы артып келе жатқанына тоқталыпты.
Қысқасы, осы сапар арқылы Оңтүстік Корея Орталық Азияға арналған аймақтық Жібек жолы стратегиясын жариялап, осы аптадағы сапар бағытын Түрікменстан, Қазақстан және Өзбекстанға бұрмақшы.
Кореяның түпкі мақсаты – Орталық Азияның бес елінің қатысуымен саммит құрып, «Корея – Орталық Азия Жібек жолы» деп аталатын аймаққа арналған жаңа дипломатиялық стратегиясының бір бөлігі ретінде келесі жылы Сеулде алғашқы кездесуін өткізуді көздеп отыр. Бұл туралы өткен жұмада Сеулде өткен баспасөз брифингінде айтылды. Сондай-ақ бұл саммит өткен жылғы Корея-Тынық мұхиты аралдары саммитінен, осы айдың басында өткен Корея-Африка саммитінен кейінгі Юн үкіметінің дипломатиялық бағытын кеңейту жолындағы келесі қадамы болмақ. Саммит Корея және Орталық Азия елдерімен серіктестіктің жаңа платформасын құруды көздейтін «Жібек жолы бастамалары» жобасы аясында өткізілмек.
Ал 27 мамыр күні еліміздің Корея Республикасындағы елшісі Нұрғали Арыстанов Кореяның белді ақпараттық порталдарының бірі «The Korea Times»-қа берген сұхбатында Қазақстан мен Корея өте жақын достық қарым-қатынастағы елдер екенін және арадағы жоғары деңгейдегі стратегиялық әріптестік нығайып келе жатқанын атап өтіпті. «Біз мұндай ынтымақтастық деңгейін санаулы елдермен ғана орнықтырамыз, ал Корея – біздің ең маңызды стратегиялық серіктестеріміздің бірі», дейді Н.Арыстанов.
Елші сұхбатында экономикалық ынтымақтастық Корея-Қазақстан әріптестігінің негізгі өзегі болып отырғанын атап өтіп, екі ел арасындағы былтырғы тауар айналымының 6 миллиард долларға жеткен межесін маңызды кезеңге балапты.
