Президент: Бізге Оңтүстік Корея технологиясын өнеркәсіпке енгізу маңызды

Президент Қасым-Жомарт Тоқаев Қазақстан-Корей бизнес форумында екіжақты экономикалық байланысты «Инвестициялар мен технологиялар — шикізат орнына» қағидатымен дамытуға болатынын айтты.
«Енді әріптестіктің анағұрлым келешегі зор бағыттары туралы пайымымызды таныстыруға рұқсат етіңіздер. Бірінші — біздің экономика үшін маңызды салалардағы кооперацияның арттыру. Бұл — жер қойнауын пайдалану және өнеркәсіп. Мұнай-газ саласында бізге оңтүстіккореялық технологияның толыққанды трансферті, сондай-ақ, заманауи қондырғылар мен қосалқы бөлшектердің өндірісін жолға қою маңызды. Біздің Теңіз, Қашаған, Қарашығанақ сияқты мұнай-газ кен орындарымыздың кеңейіп жатқанын ескерсек, бұл өте қажет», — деді Мемлекет басшысы бизнес-форумның ашылу салтанатында сөйлеген сөзінде.
Қасым-Жомарт Тоқаевтың сөзінше, елімізде 5 мыңға жуық барланбай жатқан кен орны бар.
«Кейіннен мұнай бен газ шөгінділерін игеруді көздейтін толық ауқымдағы геологиялық барлау жұмыстарын жүргізу үлкен мүмкіндіктер ашады. Аса маңызды шикізатты „Инвестициялар мен технологиялар — шикізат орнына“ прагматикалық формуласы бойынша өндіру және қайта өңдеу келешегі аса зор бағыт болып есептеледі. Біздің жер қойнауымыз пайдалы қазбалардың айтарлықтай қорын бойында сақтап жатыр. 5 мыңға жуық барланбаған кен орындары бар», — деді Президент.Samsung Electronics компаниясы елімізде тұрмыстық техника шығаратын өндіріс ашуға ниет білдірді. Бұл туралы Ақордада Оңтүстік Корея Президенті Юн Сок Ёльмен келіссөздерден кейінгі бірлескен мәлімдеме барысында Мемлекет басшысы Қасым-Жомарт Тоқаев айтты.
«Біз Президент Юн Сок Ёль мырзамен жан-жақты ынтымақтастықты нығайтуға келістік. Әсіресе, инфрақұрылым, өндіріс, қаржы, энергетика, экология, автомобиль мен аэроғарыш өнеркәсібі, ІТ, цифрландыру және басқа да салаларға басымдық беріп отырмыз. Қазір Doosan Enerbility компаниясы Түркістанда бу-газ қондырғысы арқылы жұмыс істейтін электр стансасын салып жатыр. Сонымен қатар Samsung Electronics компаниясы елімізде тұрмыстық техника шығаратын өндіріс ашуға ниет білдірді. Біз мұндай бастаманы барынша қолдаймыз», — деді Президент.
Мемлекет басшысының атап өтуінше, GL Rapha компаниясы Астанада биофармацевтика зауытын салуды жоспарлап отыр.
«Келіссөз барысында сирек кездесетін металдарды бірлесіп зерттеу және өндіру мәселесін де қарастырдық. Біз Қазақстан нарығына кіргісі келетін корей компанияларына қолайлы жағдай жасауға дайынбыз. Оны жүзеге асырудың нақты жолдары бар. Үкіметаралық комиссия іскерлік кеңеспен бизнес қауымдастығы арасындағы жұмыс тобы құрылды. Бұл құрылымдар екіжақты экономикалық байланысты нығайтуға зор серпінін тигізеді деп сенеміз”, — деді Қасым-Жомарт Тоқаев.