Түркістан облысының санитариялық-эпидемиологиялық бақылау департаментінің басшысы Нұрбек Нышановтың төрағалығымен лездемелік жиын өтті. Департаменттің басшы орынбасарлары, бөлім басшыларының және аудандық, қалалық санитариялық-эпидемиологиялық бақылау басқармалары басшыларының ZOOM қосымшасымен онлайн режимде қатысқан жиында кенеден келетін қауіпті аурудың алдын алу, балаларды сауықтыруға арналған жазғы демалыс мекемелерінің дайындығы және туберкулездің алдын алу мәселелері талқыланды.
Облыстың Бас мемлекеттік санитарлық дәрігері Нұрбек Нышанов Конго-Қырым геморрагиялық қызбасы ауруы бойынша эпидемиялық жағдайды өршітіп алмау бойынша тиісті ведомствалармен бірлескен шараларды одан әрі дамыту қажеттігін, бұл мәселе жіті бақылауында ұстайтынын жеткізді. Сондай-ақ, кенеге қарсы залалсыздандыру жұмыстарының сапасына бақылауды күшейту керектігіне назар аударды.
Күн тәртібінде қаралған мәселелер бойынша департаменттің бөлім басшылары баяндама жасап, кемшіліктер бойынша жұмыс жүргізуге нақты тапсырмалар алды. Атап айтқанда Түлкібас, Сайрам аудандарындағы балаларды сауықтыруға арналған жазғы демалыс мекемелерінің дайындықтары бойынша жүргізілген тексеру нәтижелері талқыланды. Бөлім басшылары анықталған кемшіліктерді баяндап, алдағы уақытта өзге де басқармалар жол бермес үшін өз ұсыныстарын айтты. Департамент басшысы нысандарды тексеру барысында көрілетін әкімшілік шараларды дұрыс қолдану, мемлекеттік тапсырыс жоспарларын құруға қатысты бірқатар сын-ескертпелер айтты. Сонымен қатар, сыбайлас жемқорлыққа жол бермеу, санитариялық-эпидемиологиялық бақылау қызметінің абыройына нұқсан келтіруден аулақ болып, Заң шеңберінде жұмыс істеуге шақырды.
Түркістан облысының санитариялық-эпидемиологиялық бақылау департаменті
