Азық-түлік базары – аумаққа шаруашылық қызмет көрсету, басқару және қорғау функциялары орталықтандырған, сауда қызметіне арналған оқшауланған мүліктік кешен, тұрақты негізде жұмыс істейтін және өз аумағының шекаралары шегінде автокөлік құралдарының тұруына арналған алаңмен қамтамасыз етілген тамақ өнімдерін өткізу жөніндегі сауда базары. Бүгінгі таңда облыс көлемінде жалпы 43 азық-түлік базары бар. Қазіргі таңда оның екеуі уақытша жұмыс істемейді.
Қазақстан Республикасы Денсаулық сақтау министрлігінің «Халықтың санитариялық-эпидемиологиялық саламаттылығы саласындағы мемлекеттік бақылау мен қадағалауға жататын өнімдер мен эпидемиялық мәні бар объектілердің тізбесі туралы» бұйрығына сай базарлар эпидемиялық мәні болмашы объектілер тізіміне енгендіктен, аталған нысандарға тек азаматтар тарапынан арыз-шағым, өтініштері негізінде жоспардан тыс тексеру жұмыстары жүргізіледі.
Азық-түлік базарларында күнделікті бақылау жүргізу және жабайы базарларды ретке келтіру халықтың санитариялық-эпидемиологиялық саламаттылығы саласындағы мемлекеттік органның құзіретіне жатпайды. Көшелер бойын түбегейлі жаулап алған саудагерлердің заңсыз, жабайы сауда-саттығына тосқауыл қойып, ретке келтіру қазіргі таңда қиын мәселе. Ал, жабайы сауда орындарында сатылатын азық-түлік өнімдерін сату кезінде санитарлық-эпидемиологиялық талаптардың сақталмауы халық арасында тамақтан уланудың және түрлі жұқпалы аурулардың туындау себебі болуы мүмкін. Өз кезегінде Түркістан облысының санитариялық-эпидемиологиялық бақылау департаменті рұқсат етілмеген сауда орындарында азық-түлік сатып алмауды ескертеді.
ҚР ДСМ СЭБК Түркістан облысының санитариялық-эпидемиологиялық бақылау департаменті басшысы орынбасары Искаков Аскар Бекболатұлы
