Қазақстанда қайырымдылық жасау ретке келтіріледі. Президент Үкіметке бұл іспен айналысатын ұйымдардың басын біріктіріп реестр құруды тапсырды,-деп хабарлайды ктк телеарнасы. Осылайша салада ашықтық орнап, халық алаяқтардың құрбаны болмауы керек.
Қасым-Жомарт Тоқаев, Қазақстан Республикасының Президенті:
— Бұл реестр осы саладағы барлық ақпараттық жүйеге енгізіліп, қайырымдылық ұйымдарының қызметімен, олардың қаржылық есебімен танысқысы келетін кез келген азаматқа қолжетімді болуға тиіс. Электронды қайырымдылық саласындағы азаматтарды алаяқтықтан қорғау жүйесін құру да маңызды.
Бүгінде елімізде онлайн режімде жомарттық жасау сәнге айналған. Тіпті әрбір үшінші қазақстандық интернетте қайырымдылықпен айналысады. Сол себепті жұрттың сеніміне нұқсан келтірмес үшін онлайн-банкинг арқылы жедел қайырымдылық жасау ұғымын енгізу қажет дейді президент.
Сондай-ақ көмек беруге жаны құмарларға шағын несие берілуі мүмкін. Атқарушы билік оның тетіктерін ойластырады. Жалпы бұл саладағы кемшіліктерді жойып ретке келтіруге Қазақстанда қайырымдылық туралы жаңа заң әзірленіп жатыр.
