Үкіметте Мемлекет басшысының тапсырмасымен әзірленген әйелдер құқықтары мен балалардың қауіпсіздігін қамтамасыз ету туралы заң жобасын таныстыру аяқталды. Бұл туралы Бала құқықтары жөніндегі жедел уәкіл Динара Зәкиева айтты.
«Балаларға қатысты зорлық-зомбылық үшін жазаны қатаңдату, сондай-ақ отбасылар мен балаларға көмек көрсету инфрақұрылымын құру жөніндегі барлық түзетулер Үкімет қорытындысында қолдау тапты. Бұдан әрі олар Мәжілісте талқыланатын болады», — деп жазды ол Facebook-тегі парақшасында.
Бала құқықтары жөніндегі жедел уәкілдің сөзінше, Үкіметтің қорытындысы – заң жобасымен жұмыс істеудің маңызды және көп уақыт алатын бөліктерінің бірі. Оң қорытынды шықпаса, іс жүзінде норма қабылданбайды.
Былтыр қыркүйекте Amanat-тың Мәжілістегі фракциясында және БП-да таныстырған балалар қауіпсіздігі мәселелері бойынша енгізілген 40-тан астам түзету үкіметтен қолдау тапты, олар:
балаларға қатысты зорлық-зомбылық үшін татуласу мүмкіндігін алып тастау және жазаны қатаңдату: азаптау (баптың жаңа редакциясы), қатыгездік, денсаулыққа ауыр, орташа зиян келтіру, кәмелетке толмағанды ұрлау және заңсыз бас бостандығынан айыру үшін;
зорлық-зомбылықты криминализациялау, яғни балаларға қатысты ұрып-соғу және денсаулыққа жеңіл зиян келтіру үшін қылмыстық жауапкершілік енгізу (заң жобасы аясында ересектерге де қатысты);
бала зорлау үшін бас бостандығынан өмір бойына айыру;
балаға жыныстық сипатта тиісуге қатысты бап енгізу;
балаға қатысты зорлық-зомбылыққа байланысты қылмыстар бойынша тергеу әрекеттері кезінде қамауда ұстау;
балаларға қызмет көрсететін ұйымдарды лицензиялауды енгізу (МӘМ, лагерьлер);
баланы автобустан мәжбүрлі түрде түсіріп тастау үшін; буллинг үшін жауапкершілік енгізу;
Профилактикаға қатысты:
отбасыларға, балаларға көмек көрсету инфрақұрылымын құру (Отбасын қолдау орталықтарын, Балаларды психологиялық қолдау орталықтарын ашу);
қиын өмірлік жағдайдағы отбасыларға көмек көрсетуді ұйымдастыру құзыретін бекіту;
агрессормен психологиялық жұмыс (ҚК-ке ерекше талаптар институтын енгізу аясында);
зорлық-зомбылыққа, буллингке ұшыраған балаларға көмек көрсету бағдарламаларын әзірлеу құзыретін енгізу
