Бүгін Түркістан облысы бойынша Соттар әкімшісінің басшысы Жеңіс Мақұлбаев Түркістан облысының мамандандырылған, Түркістан және Кентау қалалық соттарында болып, ғимараттардың материалдық-техникалық жай-күйімен танысып, ұжым мүшелерімен кездесті.
Аралау барысында Жеңіс Тіллабайұлы соттардағы инфрақұрылым, азаматтар үшін жасалған жағдай, сот залдарының жабдықталу мәселелеріне жіті назар аударып, фронт-офистер мен медиация кабинеттерінің жұмысымен танысты. Сонымен қатар, Соттар әкімшісінің басшысы соттардағы ақпараттық технологияларды енгізу, коммуникация, цифрландыру мәселелеріне көңіл бөліп, эпидемиологиялық жағдайдағы сот процестерін қашықтықтан өткізуде туындайтын проблемаларға назар аударды.
Сонымен қатар, Ж.Мақұлбаев аталған соттардың ұжымдарымен кездесіп, өзекті мәселелерді талқылады.
«Еліміздің сот билігінің басты мақсаты – еліміздің заңдарына сай әділ шешімдер қабылдау болғандықтан, азаматтардың, жеке және заңды тұлғалардың бұзылған құқықтарын қорғауда шешуші рөлге ие. Сондықтан соңғы жылдары Республикадағы сот органдарының құрылымдарын жетілдіруге, оның мәртебесін көтеріп, тәуелсіздігінің әлеуметтік кепілдігін күшейтуге, соттарды материалдық-техникалық жабдықтауды жақсартуға бағытталған кешенді шаралар жүзеге асырылып келеді», — деді ол жиын барысында.
Одан бөлек, Жеңіс Тіллабайұлы алдағы уақытта азаматтардың сотқа еркін жүгінуін, соттардың ашықтығы мен жариялығын қамтамасыз ету, сот практикасына озық ақпараттық технологияларды енгізу бағытында тұрақты жұмыстар жүргізілетінін, яғни, «азаматтарға қолайлы жағдай жасау», «азаматтармен кері байланыс», «соттардың инфрақұрылымдық дамуы», «цифрландыру» және «коммуникация» секілді салалар басты назарда болатынын жеткізді.
Кездесуде сот қызметкерлері көкейде жүрген сұрақтарын қойып, кейбір сұрақтарына толыққанды жауаптарын алса, бірқатар сұрақтарға зерделенуі қажет тұстары болғандықтан қосымша жауап берілетін болды.
Жиынды қорытындылай келе, Соттар әкімшісінің басшысы мемлекеттік қызметшілердің Әдеп кодексінің ережелерін, атқарушылық және еңбек тәртібін мүлтіксіз сақтау, ұжымдағы ауызбіршілікті бағалау мәселелеріне тоқталып, сыбайлас жемқорлыққа жол бермеу бағытында атқарылуы тиіс жұмыстарды нақтылады.
