Консервіленген тамақтарды тұтынғанда абай болыңыз! Себебі, ботулизм ауруының өршу кезеңі күз, қыс айлары. Осы мезгілдерде алдын-ала косервіленіп дайындалған салаттарды, қиярды, қызанақты, саңырауқұлақты тұтыну науқаны басталады. Ботулизм ауруы «Clostridium botulinum» токсиндерімен улану нәтижесінде пайда болатын жедел инфекциялық ауру. Адам ағзасына ботулотоксин қажетті өңдеуден өтпеген тамақтарды тұтынғаннан түседі. Олар көп жағдайда консервіленген қияр, баялды, саңырауқұлақ, ысталған шұжық пен қақталған балықтар.
Ботулизмнің тағамдық түрі жиі кездеседі. Ол адамнан адамға жұқпайды. Ботулизм таяқшасы спора түзетіндіктен жоғары температураға төзімді және қоршаған ортада кеңінен таралған. Әсіресе топырақта, өзен, тоған суларында кездеседі. Ал, ауасыз (анаэробты) ортада токсин бөледі.
Ауру белгілері: Ботулизм ауруының белгілері бірнеше сағаттан бірнеше күнге дейін пайда болады. Токсиннің ағзаға енуіне байланысты клиникалық белгілер тез пайда болады. Ауру келесі симптомдармен: көздің қосарлануы немесе бұлыңғыр көру, қабақтың ауырлығы, сөйлеудің бұзылуы, жұтыну қиындықтары, құрғақ ауыз және бұлшықет әлсіздігімен (иықтан басталып, бүкіл денеге таралады) сипатталады. Нәтижесінде тыныс алу бұлшықеттерінің сал ауруы пайда болады, бұл науқастың өліміне әкеледі.
Аурудың алдын алу:
— санитарлық-гигиеналық ережелерді сақтау;
— банкіні, қақпақты стерилизациялау әдісін қатаң сақтау;
— көкөністерді термиялық өңдеуден өткізу;
— дайындау барысында сірке қышқылын қолдану;
— консервілерді төмен температурада сақтау;
— қақпағы көтерілген, түсі бұзылып иісі шыққан банкілерді жедел түрде жою;
— аурудың белгісі пайда болған жағдайда өнім қалдықтарын тастамай зертханалық бақылау үшін сақтау;
— үй жағдайында консервіленген салат, саңырауқұлақ, қияр, қақталған балықты белгілі орындардан ғана сатып алу;
— үйде әзірленген консервілерді пайдалану алдында қуыру 15-20 минуттай қуыру немесе қайнату ұсынылады.
А. Искаков
Түркістан облысының СЭБД басшысының орынбасары
