Жабық зират — жерлеу аймағы жаңа жерлеу орындарын құру үшін толығымен пайдаланылған зират болып табылады. Сондықтан, «Зираттар мен жерлеу объектілеріне қойылатын санитариялық-эпидемиологиялық талаптар» қағидаларына, «Зираттарды жобалау және күтіп ұстау» ережелеріне сәйкес келмейтін әрекеттердің алдын алу мақсатында ағымдағы жылдың шілде айында Қаратау ауданы аумағындағы жерлеуге арналған зират орындарының толымдығын анықтау және жабуға ұсыныс енгізу бойынша арнайы комиссия құрылып, Заңға сәйкес өз жұмысын бастаған болатын.
Комиссия жұмысының қорытындысы бойынша аудан аумағындағы жерлеу орындары белгіленген жер телімдері толған 13 зират жабуды қажет ететіндігі анықталды. Олар: «Лутфилла» мазараты, «Қарашаш Ана» кесенесі, «Қазы Байзавий» кесенесі, «Мірәлі баба» кесенесі, «Мариям Ана» кесенесі, «Балагардон баба (Абдул Азиз)» мазараты, «Махмудхан Ата» кесенесі, «Гузал Ата» кесенесі, «Лангар Ата» мазараты, «Сархалка баба» кесенесі, «Батыр бабалар» зираты, «Хожаи Солих» кесенесі, «Жүсіп Баба» ескі қорымы аумақтарында орналасқан жерлеу орындары.
«Соңғы уақытта жергілікті тұрғындар зираттарда жерлеу орындары болмаса да, жерлеу рәсімдерін жасап жүрген азаматтардың Заңға қайшы әрекеттері жиі орын алатындығын айтып шағымданған болатын. Осы орайда, аудан басшысының тапсырмасымен жедел комиссия құрылып, аудан аумағында орналасқан барлық зираттарға зерделеу жұмыстары жүргізілді. Жұмыстар нәтижесінде жабуға ұсынылатын зираттар бойынша Қаулы жобасы әзірленді »-деді, аудан әкімі орынбасары, комиссия төрағасы А.Парманов.
Еске сала кетейік, аудан әкімі аппараты аталған 13 орындағы зираттар жабылғанымен, тұрғындардың бұл орындарға келіп зиярат етуіне ешқандай шектеу қойылмайтындығын ескертті.
